Çdo ditë në vendin tonë ndodhin dhjetëra raste të dhunës në familje, por jo të gjitha raportohen në Polici. Zakonisht viktima janë gratë, të cilat përjetojnë dhunë psikike e fizike jo vetëm nga bashkëshortët, por edhe nga anëtarët e tjerë të familjes. Një rast i tillë është raportuar mbrëmë pas mesnate në rrugën ‘Hamdi Gashi’ në Vushtrri, raporton Gazeta Sinjali.
Sinjali mëson se një grua 53-vjeçare ka denoncuar në Polici bashkëshortin e saj 52-vjeçar, pasi që sipas saj, kishte tentuar ta sulmojë fizikisht.
Pasi e pa rrezikun që po i kanosej, gruaja vendosi që të kërkojë ndihmën e Policisë, ndërsa vetë ishte mbyllur në njërën nga dhomat e banesës bashkë me vajzën e saj.
Me derë të kyçur me çelës, ajo dhe vajza e saj kanë pritur derisa në vendin e ngjarjes kanë shkuar njësitet policore, të cilët kanë intervenuar që ta shpëtojnë gruan e cila është në hall me bashkëshortin e saj.
Çifti e zbardhën mëngjesin në Stacion Policor, pasi u shoqëruan nga Policia që të intervistohen nga hetuesit.
Sipas burimeve të Gazetës Sinjali, 53-vjeçarja ka deklaruar në Polici se bashkëshorti i saj kohë pas kohe e humb kontrollin.
Lidhur me rastin është njoftuar edhe prokurori i cili ka sugjeruar që i dyshuari të lirohet dhe ndaj tij të hapet rasti ‘Dhunë në familje’.
