Presidenti i Serbisë, Aleksandar Vuçiq, i është përgjigjur kryeministrit të Kosovës, Albin Kurti, për një deklaratë të këtij të fundit rreth Asociacionit të Komunave me shumicë serbe, shkruan Gazeta Sinjali.

Ai ka thënë se vendi të cilin e drejton nuk është aq i dobët, andaj nuk i ka frikë kërcënimet për formimin e “Shqipërisë së Madhe”.

“Edhe sot, kur ata na kërcënojnë me formimin e ‘Shqipërisë së Madhe’ dhe thonë se ‘nuk ka asgjë nga Asociacioni i Komunave serbe’, ne po themi që ne nuk jemi aq të dobët sa kemi qenë. Serbia nuk është dhe nuk do të jetë një grusht tërshëre për çdo sorrë të botës së bardhë që dëshiron ta hajë atë. Thjesht u kërkoj atyre që të mos na kërcënojnë dhe të mos mendojnë se Serbia është thyer dhe se nuk do të di si të përgjigjen. Kemi falur shumë, por nuk do t’i harrojmë kurrë. Ne jemi gati ta bëjmë të gjithë Ballkanin një rajon të forte”, përfundoi kreu i shtetit serb.

Ky reagim i Vuçiqit erdhi pas deklaratës së Kurtit i cili tha se Asociacioni nuk mund të ketë karakter njëetnik.

“Neni 44 i Kushtetutës së Kosovës garanton lirinë e asocimit, por nuk ka nevojë të negociohet për diçka që ne e kemi të garantuar me Kushtetutë. Nuk mund të kemi asociacion një-etnik, nuk mund të jetë karakteri i Asociacionit të komunave – por jo një-etnik e thotë edhe Gjykata Kushtetuese, i shpallur më 25 dhjetor të vitit 2015. Mund të ketë Asociacion të komunave të bjeshkës së Rugovës, maleve të Sharrit”, tha ai të hënën në një diskutim për dialogun, të organizuar nga Fondacioni për Shoqëri të Hapur, transmeton Klan Kosova.

Mes tjerash, Vuçiq ka deklaruar mbrëmë se nuk kanë nevojë për njohje reciproke me Kosovën.

“Sot, kur dëgjojmë idenë se Kosova na njeh dhe se ne e njohim Kosovën. Nuk na duhet kjo njohje. Ju nuk do të shkeleni mbi të kaluarën dhe të ardhmen tonë”./Gazeta Sinjali/