Disa njerëz janë vrarë, përfshirë fëmijë, nga dy shpërthime të dyshuara si sulme vetëvrasëse me bombë që kanë tronditur aeroportin e Kabulit të enjten (26 gusht).
Incidenti ka shtuar kaosin në aeroport disa ditë para datës 31 gusht kur duhet të përfundojë tërheqja e plotë trupave të huaja nga Afganistani.
Zëdhënësi i Pentagonit John Kirby tha se fillimisht ndodhi një shpërthim i madh në Portën e Abacisë të aeroportit dhe u pasua nga një shpërthim i dytë aty pranë.
Shpërthimet, sipas tij, ishin “rezultat i një sulmi kompleks që rezultoi në një numër viktimash amerikane dhe civile”.
CNN citoi një burim të Pentagonit të thoshte se të paktën tre ushtarë amerikanë u plagosën në sulm.
Mijëra njerëz ishin mbledhur para aeroportit në përpjekje për të ikur nga Afganistani pavarësisht paralajmërimeve për një kërcënim “shumë të besueshëm” të një sulmi terrorist.
Shtëpia e Bardhë tha se presidenti, Joe Biden, është informuar për incidentin dhe po zhvillon bisedime me zyrtarët e sigurisë në lidhje me situatën në Afganistan, ku Shtetet e Bashkuara janë në hapat e fundit për t’i dhënë fund luftës 20-vjeçare.
Një zyrtar taleban ka thënë se të paktën 11 persona janë vrarë në sulmin në aeroportin e Kabulit. Zyrtari tha se në mesin e viktimave kishte gra dhe fëmijë dhe se një numër i rojeve talebane ishin plagosur. Ky informacion nuk është konfirmuar.
Ndërkohë mediumi Tolo News i Afganistanit raportoi se një numër i të plagosurve nga shpërthimi janë transportuar në një spital lokal.
Askush nuk e ka marrë ende përgjegjësinë për sulmet.
Më herët, Shtetet e Bashkuara dhe vendet e tjera perëndimore i paralajmëruan qytetarët e tyre që të largohen menjëherë nga zonat përreth aeroportit të Kabulit, për shkak të kërcënimeve për një sulm terrorist.
Një burim tha për agjencinë Reuters se zyrtarët amerikanë besojnë fuqishëm se përgjegjësia për sulmet bie mbi grupin terrorist Shtetit Islamik, celula e të cilit në Afganistan njihet me emrin Shteti Islamik Khorasan (ISIS-K).
Më shumë se 82,000 njerëz janë nxjerrë tashmë me aeroplanë nga Kabuli, i cili ka rënë në duart e talebanëve më 15 gusht.
Vendet po nxitojnë t’i evakuojnë njerëzit deri në afatin e 31 gushtit.
Mijëra njerëz janë ende duke pritur brenda dhe jashtë aeroportit, me shpresën se do të mund të largohen.
Ambasada e Shteteve të Bashkuara në Kabul i këshilloi qytetarët amerikanë që të shmangin udhëtimin në aeroport dhe tha se ata që tashmë janë në portat e tij, duhet të largohen menjëherë, për shkak të “kërcënimeve të sigurisë”.
Zyra e Jashtme britanike lëshoi një këshillë të ngjashme, duke u thënë njerëzve pranë aeroportit që “të largohen në një vend të sigurt”. Ajo tha se ekziston një “kërcënim i vazhdueshëm dhe i lartë i sulmit terrorist”.
“Ka një raportim shumë, shumë të besueshëm për një sulm të afërt”, tha ministri britanik për Forcat e Armatosura, James Heappey.
Australia gjithashtu u bëri thirrje qytetarëve të saj dhe atyre me viza për në Australi që të largohen nga zona, duke thënë se ekziston një “kërcënim shumë i lartë për sulm terrorist”.
Presidenti i Shteteve të Bashkuara, Joe Biden, ka caktuar 31 gushtin si afat për përfundimin e evakuimit të njerëzve dhe të tërheqjes së trupave amerikane, që ruajnë aeroportin.
Biden ka përmendur kërcënimet terroriste nga dega rajonale e grupit militant Shteti Islamik si arsye për mbajtjen e këtij afati.
Dega e Shtetit Islamik në Afganistan dhe Pakistan ka qenë përgjegjëse për disa nga sulmet më vdekjeprurëse në këto vende, viteve të fundit.
Derisa trupat perëndimore po punojnë brenda aeroportit për evakuimin e qytetarëve, luftëtarët talebanë po ruajnë perimetrin e jashtëm.
Ahmedullah Rafiqzai, një zyrtar afgan që punon në Drejtorinë e Aviacionit Civil në Aeroportin e Kabulit, tha për agjencinë Reuters se do të ishte e lehtë për një sulmues vetëvrasës që t’i sulmonte korridoret, por tha se është skeptik se njerëzit do t’i dëgjojnë paralajmërimet.
“Vendosmëria për të ikur nga ky vend i bën që të mos kenë frikë nga vdekja. Të gjithë po rrezikojnë jetën e tyre”, tha Rafiqzai.
Shtëpia e Bardhë tha se Biden është informuar për kërcënimin nga Shteti Islamik, si dhe për planet e emergjencës për evakuim. Biden ka urdhëruar largimin e të gjitha trupave nga Afganistani, në bazë të një marrëveshjeje me talebanët.
Qëkur talebanët kanë hyrë në Kabul më 15 gusht, Shtetet e Bashkuara dhe aleatët e tyre kanë evakuuar më shumë se 88,000 njerëz, përfshirë 19,000 në 24 orët e fundit.
Ushtria amerikane ka thënë se aeroplanët po ngrihen çdo 39 minuta nga aeroporti i Kabulit.
Sekretari amerikan i Shtetit, Antony Blinken, tha në një konferencë për media në Uashington se nuk ka afat në përpjekjet për të ndihmuar njerëzit që duan të largohen nga Afganistani – si amerikanët, ashtu edhe të tjerët – dhe se kjo do të vazhdojë “për aq kohë sa duhet”.
Talebanët kanë thënë se trupat e huaja duhet të jenë jashtë Afganistanit deri në fund të këtij muaji dhe kanë përjashtuar çdo zgjatje të afatit.
Ata u kanë bërë thirrje afganëve që të qëndrojnë, ndërsa kanë thënë se ata që kanë leje për t’u larguar, do të lejohen ta bëjnë këtë sapo të rifillojnë fluturimet komerciale.
Talebanët kanë sunduar Afganistanin edhe në periudhën 1996-2001, me një interpretim brutal të ligjit islamik.
Talebanët tani premtojnë një sundim më të butë, por shumë kanë frikë nga kufizimet e ashpra që mund t’i imponojnë, si dhe nga ndëshkimi për shkak të punës me ushtritë e huaja dhe misionet perëndimore, raporton REL.
Shqetësime të veçanta ka për gratë, të cilave, gjatë sundimit të mëparshëm taleban, u është ndaluar shkollimi dhe punësimi.
