Pas 18 viteve të luajtura në nivele të larta, Valon Behrami po mendon t’i japë fund karrierës futbollistike, përcjell Sinjali Sport.

Mesfushori kosovar që aktivizohet me skuadrën italiane Genoa nuk është i sigurt sa i përket të ardhmes në futbollin aktiv.

Mediat në Itali kanë raportuar se Behrami po mendon seriozisht tërheqjen nga futbolli në fund të këtij edicioni.

Por ish-reprezentuesi i Përfaqësueses së Zvicrës ka pranuar së fundmi një tjetër ofertë nga skuadra aktuale Genoa për vazhdimin e kontratës. Genoa i ka ofruar një tjetër kontratë njëvjeçare, pasi drejtuesit e klubit vazhdojnë të besojnë në aftësitë e shqiptarit.

Përkundër se tanimë është 35-vjeçar, Behrami këtë edicion ka zhvilluar 24 ndeshje në Serie A, ku ka bërë edhe një asistim.

Gjithsesi lojtari ende nuk ka marrë vendimin përfundimtar dhe pas përfundimit të sezonit pritet të vendos nëse do ta përfundojë karrierën apo do të bindet për të vazhduar edhe një vit me Genoan në Serie A.

Behrami ka një karrierë të pasur, pasi ka luajtur për skuadra si Verona, Lazio, Fiorentina, Napoli e Udinese në Serie A.

Përveç skuadrave të lartpërmendura, mesfushori nga Kosova karrierë ka bërë edhe në Zvicër me Luganon e Sionin. /Gazeta Sinjali Sporti/