Kompania amerikane Pfizer dhe partneri i saj gjerman BioNTech thanë të mërkurën se tri doza të vaksinës së tyre arritën ta neutralizojnë variantin e ri Omicron gjatë një testi laboratorik.
Pfizer/BioNTech thanë gjithashtu se ata mund të prodhonin një vaksinë kundër Omicronit në mars të vitit 2022, nëse ishte e nevojshme.
Sipas Pfizer/BioNTech-ut të dhënat tregojnë se varianti Omicron ishte neutralizuar me po aq efektivitet pas dozës së tretë, sikurse dy dozat kanë vepruar ndaj virusit origjinal të gjetur për herë të parë në Kinë.
“Vaksinimi i plotë me dy dozat e para dhe bërja e dozës përforcuese, mbetet mënyra më e mirë për të parandaluar përhapjen e COVID-19-s”, tha në një deklaratë shefi i Pfizer-it, Albert Bourla.
Gjetjet janë gjerësisht në përputhje me një studim paraprak të publikuar të martën nga studiuesit e Institutit të Kërkimeve në Fushën e Mjekësisë në Afrikën e Jugut. Ata sugjerojnë se një injeksion i tretë i vaksinës Pfizer/BioNTech mund të ndihmojë në shmangien e infeksionit me Omicron.
Por sipas një analize laboratorike të kryer në spitalin universitar të Frankfurtit në Gjermani, përgjigja me antitrupa ndaj Omicron-it ishte e ulët edhe pas tre injeksionesh.
Kosova, nga nesër do të administrojë edhe dozën e tretë antiCOVID.
