Instituti për Politika Sociale “Musine Kokalari”, ka publikuar raportin “Ndikimi Social i Hidrocentraleve në shoqërinë tonë”.
Dardan Bujupi, koordinatori i projektit në këtë institut, tha se hulumtimi është i bazuar nga intervistat që janë bërë në terren, shkuran Gazeta Sinjali.
Ai tha se sipas Kelkos Energy investimet për ndërtimin e tri hidrocentraleve në Deçan arrijnë shumën e 53 milionë eurove.
E gjetur tjetër sipas tij, po del të jetë edhe shkelja e Ligjit për Ujëra.
“Gjatë këtij hulumtimi objekt studimi e kemi pasur Grykën e Deçanit. Hulumtimi është bazuar duke marr parasysh dy lloje të burimeve. Të gjeturat janë mbështetur në informatat e marra gjatë intervistave. Gjatë hulumtimit i kemi evidentuar disa të gjetura e njëra ndër to është shkelja e të drejtave politike. Edhe diskutimi publik ka qenë i organizuar keq duke pamundësuar pjesëmarrjen e qytetarëve”, tha ai.
“Sipas Kelkos Energy investimet për ndërtimin e tri hidrocentraleve arrijnë shumë e 53 milionë eurove. Premtimet për rimëkëmbjen mjedisore nuk janë adresuar asnjëherë dhe i është dhënë përparësi koncesionit jo transparent. Një e gjetur tjetër është shkelja e Ligjit për Ujëra ku është dhënë pa proces konkurrues”, ka shtuar Bujupi.
Belgzim Kamberi, drejtor i Bordit në Institutin për Politika Sociale “Musine Kokalari”, pati disa rekomandime.
“Ne mendojmë që duhet të specifikohen detajet e debatit publik dhe të përcaktohen hapësira e cila duhet të jetë, të mbahen tri dëgjime publike për një licencë”, tha ai.
“Në rast së vendosjes licenca të jepet përmes procedurës me koncesion. Leja nga ZRRE-ja të jetë në përputhje me parimin bazë për ndërtimin e hidrocentraleve”, ka shtuar Kamberi.
