Luan Krasniqi nuk do të jetë ambasador i Kosovës në Gjermani. Kështu thotë vetë ish-boksieri nëpërmjet një shkrimi në llogarinë e tij në Facebook.
Lajmeve se mund të emërohet ambasador i Kosovës në Gjermani u është përgjigjur Luan Krasniqi, ish-kampioni i Europës në boks. Ai thotë se do të vazhdojë të jetë ‘ambasador sportiv” dhe se nuk ka qëllime të tjera.
“Luani, mbetet sportist dhe mik i juaji i mirë. Ambasadorit të ri të Kosovës në Gjermani, që tash i uroj sukses, kurse juve, miq të mi, ju paça të gjithëve me shëndet!”, shkroi ai në postim.
“Përkundër faktit se detyrën e ambasadorit e çmoj dhe e vlerësoj si tejet të rëndësishme, veçmas të ambasadorit në Gjermaninë mike të Kosovës dhe me vlera të larta demokratike, propozimi i dhënë nuk përkon me interesimin tim dhe kjo duhet të konsiderohet si iniciative individuale për të cilën nuk kam qenë fare në dijeni. Unë, mbetem i përkushtuar në vendosjen e urave të reja të miqësisë së Kosovës dhe Gjermanisë duke ndihmuar e mbështetur nisma dhe angazhime për të mirën dhe të mbarën e njerëzve, dhe nuk pretendoj asnjë funksion, detyrë apo emërtim, si ky që është dhënë”, deklaroi ai.
Shkrimi i plotë i tij në Facebook:
Miq të mi të respektuar,
sot, në shumë portale dhe në disa media elektronike, qenka publikuar një propozim që unë të emërohem ambasador i Republikës së Kosovës në Gjermani. Ju informoj se, unë, tashmë 35 vite, e mbaj me krenari epitetin e ambasadorit sportiv të dhuruar nga aderuesit sportiv dhe me krenari, vendin tim e kam përfaqësuar në sportin e boksit, me të cilin kam përjetuar kënaqësinë duke u ngjitur në piedestalin më të lart të karrierës sportive.
Prandaj, përkundër faktit se detyrën e ambasadorit e çmoj dhe e vlerësoj si tejet të rëndësishme, veçmas të ambasadorit në Gjermaninë mike të Kosovës dhe me vlera të larta demokratike, propozimi i dhënë nuk përkon me interesimin tim dhe kjo duhet të konsiderohet si inisiativë individuale për të cilën nuk kam qenë fare në dieni. Unë, mbetem i përkushtuar në vendosjen e urave të reja të miqësisë së Kosovës dhe Gjermanisë duke ndihmuar e mbështetur nisma dhe angazhime për të mirën dhe të mbarën e njerëzve, dhe nuk pretendoj asnjë funksion, detyrë apo emërtim, si ky që është dhënë.
Luani, mbetet sportist dhe mik i juaji i mirë.
Ambasadorit të ri të Kosovës në Gjermani, që tash i uroj sukses, kurse Juve, miq të mi, Ju paça të gjithëve me shëndet!
03.09.2021,
I juaji, Luani
