Sulmet ajrore turke, kanë goditur disa qytete në Sirinë veriore, duke përfshirë qytetin Kobane. Kjo është konfirmuar nga forcat e udhëhequra nga kurdët dhe një grup i monitoruesve britanez.
Këto sulme kanë ardhur disa ditë pasi Ankaraja, ka fajësuar Partinë e Punëtorëve të Kurdistanit, për sulmin me bombë që la të vdekur gjashtë persona në qendër të Stambollit.
Përmes një postimi në rrjetin social Twitter, zëdhënës i Forcave Demokratike Siriane, Farhad Shami, tha se qyteti i cili mposhti ISIS-in, po i nënshtrohet bombardimeve nga avionët e pushtimit turk.
Kobane, një qytet me shumicë kurdë në Sirinë veriore pranë kufirit turk, u pushtua nga grupi i Shtetit Islamik në fund të vitit 2014, megjithëse luftëtarët kurdë i dëbuan ata në fillim të vitit të 2015.
Si PKK ashtu edhe YPG kanë mohuar çdo përfshirje në sulmin e Stambollit, në të cilin u vranë gjashtë persona. Por ministri i brendshëm turk, Süleyman Soylu, ka thënë se Ankaraja beson se urdhri për sulmin është dhënë nga Kobane.
