Tërheqja e kursimeve pensionale vazhdon të jetë debat në mesin e qytetarëve dhe institucioneve.
Për këtë çështje, kryeministri Albin Kurti është shprehur hapur kundër tërheqjes së një pjese të parave nga Trusti duke thënë se kjo nuk e zgjedh problemin e qytetarëve.
Ai ka thënë se edhe ekspertët e Fondit Monetar Ndërkombëtarë kanë deklaruar se tërheqja e një përqindjeje nga Trusti është e gabuar.
“Kemi thënë edhe më herët edhe si opozitë në 2020, edhe 2021 në qeveri me Pakon e Ringjalljes Ekonomike e zbusim krizën, mirëpo nuk konsiderojmë që duke marrë nga pleqëria individuale e punëtorëve të tanishëm do të mund ta zgjedhim problemin. Edhe dy ekspertë të FMN-së e kanë dhënë vlerësimin se një zgjidhje e tillë nuk është zgjidhje”, ka deklaruar Kurti pasi bëri homazhe te busti i Zahir Pajazitit në Prishtinë.
Kujtojmë se është PDK-ja e cila ka iniciuar ndryshimin e ligjit për tërheqjen e një pjese të Trustit.
