Gjykata e Arbitrazhit ka vendosur për herë të dytë në favor të “Dardafon”, për këtë ka reaguar Telekomi i Kosovës, duke thënë se po paguan faturat e politikës dhe grupeve të interesit nga e kaluara, derisa edhe ka bërë thirrje që të ketë hetime për këtë rast.
Sipas tyre, ata obligohen t’ia paguajnë kompanisë “Dardafon” rreth 13 milionë euro dëmshpërblim.
Në reagimin e tyre thuhet se “Telekomit të Kosovës Sh.A., të hënën pas orës 16, i erdhi edhe një “faturë” shumëmilionëshe (rreth 13 milionë euro), për të paguar, pas asaj të cilën e kishte pranuar në vitin 2016 për një shumë prej 39 milionë eurosh, e cila e pati tronditur nga themelet kompaninë dikur më të suksesshme në vend”.
Mes tjerash thuhet se “Në gjendjen e krijuar, do të vazhdojmë të angazhohemi që “faturat” e politikës dhe grupeve të interesit jashtë dhe brenda Telekomit të Kosovës Sh.A., të hetohen nga institucionet e rendit dhe ligjit, që nga zanafilla e tyre, duke përmbyllur kështu një epokë kur pjesë të krimit të organizuar dhe të politikës në bashkëveprim po e rrënonin pronën publike dhe në veçanti kompanitë publike, në një përpjekje të përvetësimit të saj/tyre”.
Telekomi e ka quajtur këtë vendim të parregulltë, derisa ka paralajmëruar se do të ndjekë rrugët ligjore për të sfiduar vendimin.
“Si i tillë, vendimi është në esencë i parregullte dhe Telekomi i Kosovës Sh.A. do të vazhdojë të ndjekë rrugët ligjore për të sfiduar vendimin. Ekspertët tonë ligjor janë duke përgatitur argumentet përmes të cilave do të sfidojnë Vendimin e ICC no. 2481 në gjykatat kompetente”, thuhet në reagimin e Telekomit.
