Ministri i Punëve të Brendshme, Xhelal Sveçla është takuar sot me ministrin e Punëve të Brendshme të Shqipërisë, Bledi Çuçi, transmeton Gazeta Sinjali.
Sveçla uroi Çuçin për detyrën si dhe për Mbledhjen e parë të Këshillit të Ministrave pas konstituimit të institucioneve duke e falënderuar atë për nënshkrimin e dy marrëveshjeve: Marrëveshjen e trafikut lokal të kufirit si dhe për Marrëveshjen për hapjen e pikës së përbashkët të kalimit kufitar Shishtavec (Kukës).
Sveçla theksoi se bashkëpunimi i dy vendeve do të thellohet në shumë dimensione dhe në dobi të qytetarëve nga të dy anët e kufijve.
“Ministri theksoi se qëndrojnë të bashkuar si gjithmonë, si në paqe ashtu edhe në sfida të përbashkëta. Gjithashtu ministri Sveçla theksoi se Ministritë e Brendshme të të dy shteteve tona kanë më shumë se 20 marrëveshje të cilat padyshim kanë qëllim lehtësimin e jetesës dhe zhvillimin e veprimtarisë së shqiptarëve në të dy anët e kufirit” thuhet në kumtesën e MPB-së.
Krejt në fund tregohet se dy ministrat u zotuan se ky bashkëpunim të vazhdojë edhe në të ardhmen ndërmjet dy Policive të Kosovë dhe Shqipërisë në fushën e sigurisë publike, luftimin e krimit dhe të korrupsionit.