Federata e Basketbollit të Kosovës ka njoftuar se sezoni i ri në Superligën e basketbollit do të fillojë më 10 shtator, raporton Gazeta Sinjali.
Bordi i FBK-së, i mbledhur së fundmi, e ka shqyrtuar situatën aktuale në basketbollin e këtushëm dhe i ka marrë ndër të tjera edhe disa vendime.
Përveç njoftimit se kur do të fillojë sezoni i ri i basketbollit, shtëpia e basketbollit kosovar ka njoftuar se Superliga e Meshkujve në dy vitet e ardhshme do ta marrë emrin Prince Caffe Superliga.
Bordi i FBK-së vendosi që ta organizojë Kuvendin Statutar më 1 Tetor, me të vetmen pikë të rendit të ditës “Ndryshimet Statutare”, pas udhëzimeve të MKRS-së për të gjitha Federatat Sportive, për të përfshirë në Statut përgjegjësitë që përcaktohen me Ligjin për Parandalimin dhe Sanksionimin e Dhunës dhe Dukurive Tjera Negative në Ngjarjet Sportive, Luftimin e dopingut në basketboll, si dhe Dispozitën për mënjanimin e konfliktit të interesit të organeve vendim-marrëse.
Ky Bord, tutje ka vendosur që pas rekomandimeve të Komisionit për Licencim të FBK-së ta shtyjë afatin për licencimin e klubeve për garim në edicionin 2022/23 deri më 1 Shtator 2022.
Siç njofton FBK-ja, kjo vlen për klubet që nuk i kanë kompletuar dokumentacionet që kanë qenë kriter për licencim dhe garim në FBK.
Komisioni për Licencim do të takohet më 2 Shtator për t’i dhënë rekomandimet përfundimtare tek Bordi i FBK-së për klubet që i kanë përmbushur kriteret për licencim dhe garim në edicionin e ri.
Ndër të tjera, Bordi i FBK-së e ka miratuar në parim kërkesën e KB Bora Basket për t’u inkuadruar në Ligën e Parë të Meshkujve nga edicioni 2022/23 pas paraqitjes së projektit serioz dhe afatgjatë, me theks të veçantë zhvillimin e basketbollit ndër gjenerata të reja.
Bordi i ka miratuar edhe tarifat e reja për zyrtarët e ndeshjeve të garave të FBK-së dhe e miratoi Rregulloren e Punës së Komisionit të Garave të FBK-së.
