Europdeputetja Tanja Fajon është shprehur sot se Bashkimi Evropian është marrë peng nga Franca që nuk kupton dhe vazhdon të minojë interesin tonë në Ballkan.

Fajon ka theksuar se ndonëse Shqipëria dhe Maqedonia e Veriut nuk morën dje dritën jeshile për të hapur bisedimet me BE, PE mbetet një aleat i fortë i tyre.

Sipas saj, me vendimin për moshapjen e negociatave, “besueshmëria e unionit u shkatërrua”.

“Franca po luan një lojë të ndyrë politike dhe kam frikë se ne të gjithë do të paguajmë çmimin e kësaj”, ka thënë Fajon.

Kjo, sipas saj është e papranueshme.

“Jam jashtëzakonisht e zhgënjyer që humbën një tjetër mundësi për të demonstruar se zgjerimi vlen dhe kështu ne mbajmë premtimet tona. BE është marrë peng nga Franca që nuk kupton dhe vazhdon të minojë interesin tonë në Ballkan”, ka nënvizuar Fajon.