Një aeroplan pasagjerësh nga Tanzania është rrëzuar në liqenin Viktoria teksa tentoi të ulej në qytetin buzë liqenit Bukoba, si pasojë mbeten të vrarë të paktën 19 persona.
Njëzet e gjashtë nga 43 personat në bordin e fluturimit Precision Air u shpëtuan fillimisht dhe u dërguan në spital.
Dy pilotët i mbijetuan përplasjes dhe arritën të flasin me zyrtarët lokalë nga kabina, por kryeministri thotë se ata mund të kenë vdekur që atëherë.
Punonjësit e shpëtimit dhe peshkatarët lokalë po përpiqen të shpëtojnë të tjerët ende të bllokuar.
Abdul Nuri ishte në aeroport duke pritur fluturimin e kthimit për në qytetin më të madh të Tanzanisë, Dar es Salaam, kur pa avionin të zhytej në ujë.
“Ne ishim vërtet të tronditur. Njerëzit u kapën nga paniku dhe disa filluan të qanin dhe të bërtisnin,” tha ai për BBC.
“Në portën e mbërritjeve njerëzit gjithashtu u kapën nga paniku shumica prej tyre prisnin të mirëpritnin të afërmit e tyre.”
Ai ka folur me peshkatarët që ishin të parët në vendngjarje. Ata i thanë se arritën të futeshin në aeroplan për të shpëtuar njerëzit pasi një stjuardesë hapi derën e pasme ndërsa avioni ishte në ujë.
Përplasja ka ndodhur si pasojë e motit të keq, por shiu është ndalur, duke lejuar shpëtimtarët të arrijnë në vendin e rrëzimit. Punonjësit e urgjencës kanë përdorur litarë për të tërhequr avionin ATR-42 më afër bregut dhe një pjesë e trupit të aeroplanit është tani mbi ujë.
