image Shefi i OBSH-së: S’kemi qenë kurrë në pozitë më të mirë për t’i dhënë fund pandemisë
[wp-story id="814678"]

Shëndetësi

Shefi i OBSH-së: S’kemi qenë kurrë në pozitë më të mirë për t’i dhënë fund pandemisë

news image

Organizata Botërore e Shëndetësisë (OBSH) ka thënë se numri i rasteve të infektimit me koronavirus ka rënë në mënyrë dramatike në botë.

Prandaj, ky institucion u ka bërë thirrje shteteve që të shfrytëzojnë këtë mundësi për t’i dhënë fund pandemisë.

Numri i rasteve të reja me koronavirus, i cili ka lënë të vdekur miliona njerëz prej fundit të vitit 2019, ka rënë në nivelet më të ulëta prej marsit të vitit 2020, ka thënë shefi i OBSH-së, Tedros Adhanom Ghebreyesus.

“Nuk kemi qenë kurrë në pozitë më të mirë për t’i dhënë fund pandemisë. Nuk e kemi arritur ende këtë gjë, por fundi po shihet”, u ka thënë ai gazetarëve.

Sipas tij, bota duhet të veprojë tani.

“Një vrapuese maratone nuk ndalet kur sheh se i është afruar fundit. Përkundrazi, ajo vrapon edhe më shumë, me gjithë energjinë që i ka mbetur. Ashtu duhet të veprojmë edhe ne. Ne po e shohim fundin. Jemi në pozicion fitues. Tani është koha më e keqe për të ndalur vrapin”, ka paralajmëruar ai.

Për koronavirusin e ri, që shkakton sëmundjen COVID-19, është raportuar për herë të parë në dhjetor të vitit 2019 në Vuhan të Kinës.

Organizata Botërore e Shëndetësisë e pati shpallur koronavirusin si pandemi më 11 mars të vitit 2020. Deri më tani janë regjistruar mbi gjashtë milionë njerëz të vdekur me këtë virus.

/GazetaSinjali/