Legjenda e Newcastle United, Alan Shearer beson se ish-sulmuesi i Chelseat, Didier Drogba, është afrikani më i madh që ka luajtur në Premier League.
Sulmuesi i Bregut të Fildishtë kaloi nëntë vjet në klub në dy periudha të ndryshme, duke i udhëhequr ata në disa trofe të mëdhenj. Periudha e tij fillestare ishte midis 2004 dhe 2012, ndërsa e dyta ishte në sezonin 2014/15.
Yaya Toure, Nwankwo Kanu, Emmanuel Adebayor, Jay-Jay Okocha dhe së fundmi dyshja e Liverpoolit, Mohamed Salah dhe Sadio Mane janë disa nga lojtarët që kanë shkëlqyer në Premier League.
Salah ka qenë një senzacion në Liverpool që kur u bashkua në vitin 2017. Përveç që shënoi më shumë se 150 gola për ta, ai ka fituar titullin e Premier League, Ligën e Kampionëve dhe Kupën e Botës për Klube FIFA.
Megjithatë, Shearer ende e vlerëson Drogban më lart se kapitenin e Egjiptit.
“Për mua, është Drogba vetëm për faktin se ai ka katër tituj të Premierligës, katër kupa të FA, nëntë gola në nëntë finale të kupave, një titull të Ligës së Kampionëve dhe 177 gola për Chelsean, kjo është për mua”, tha Shearer, cituar nga London World.
Ndjenjat e Shearer janë të njëjta me ato të shprehura nga ikona e futbollit nigerian Yakubu Ayegbeni në një intervistë të mëparshme kur ai po krahasonte Salah dhe Drogba.
Ish-sulmuesi i Everton dhe Middlesbrough nuk e pa arsyetimin për ta konsideruar 29-vjeçarin si afrikanin më të mirë që ka zbukuruar ligën angleze – edhe pse ‘Yak’ u mrekullua me bëmat e ish-yllit të Romës.
“Nuk mund të thuash se Salah është afrikani më i mirë që luan në Premier League. Drogba ishte diçka e veçantë sepse ai shënonte për argëtim,” tha Ayegbeni për GOAL.
“Sidoqoftë, ju duhet t’i jepni Salah meritën për thyerjen e rekordit të legjendës së madhe, gjë që e bën atë një nga afrikanët më të mëdhenj në ligën angleze, por tani për tani, ai sigurisht nuk është më i madhi”, kishte deklaruar ai.
