Presidentja e vendit, Vjosa Osmani në ceremoninë e pranim-dorëzimit të donacionit të SHBA-së me automjete ushtarake të blinduara, ka thënë se SHBA-ja po kujdeset që Kosova t’i zhvillojë kapacitetet e saj ndërvepruese ushtarake.

“Dua që t’i shpreh mirënjohjen e thellë të qytetarëve të Republikës së Kosovës presidentit të Shteteve të Bashkuara, presidentit Biden, ambasadorit Kosnett, gjithë qeverisë amerikane, në veçanti ushtrisë së SHBA-së, por mbi të gjitha popullit amerikan, i cili po kujdeset që Kosova t’i zhvillojë kapacitetet e saj ndërvepruese ushtarake krahas zhvillimit të jetës demokratike dhe funksionimit të mirëfilltë të institucioneve të vendit”, tha Osmani.

Ajo më tej tregoi karakteristikat e automjetet që SHBA-ja ia dhuroi FSK-së. Osmani tha se ato u rezistojnë predhave dhe se janë të ndërtuara për terrene të vështira.

“Këto pajisje të cilat janë karakteristikë për terrene të vështira dhe kanë rezistencë efikase ndaj goditjes së predhave, do t’u mundësojnë juve që veprimet tuaja në ruajtjen e paqes t’i zgjeroni e t’i shtrini gjithandej ku ju kërkohet”, tha presidentja Osmani.

Ajo ka theksuar se pajisjet ushtarake të cilat po i pranojmë sot janë dëshmi se FSK-ja po zhvillohet dita-ditës në ushtri bashkëkohore, e aftë që t’i shërbejë vendit dhe të sigurojë paqen e qëndrueshme në rajon, por edhe në partner të besueshëm të aleatëve tanë, synimet e të cilëve përkojnë me qëllimet tona strategjike.

“Ne shpresojmë se do ta përmbyllim periudhën tranzicionit sa më shpejt që të jetë e mundur. Këtë garanci po na i japin partnerët tanë strategjik, SHBA-të para së gjithash, të cilat po punojnë ngushtë me strukturat udhëheqëse të Forcave tona të Armatosura, me Ministrinë e Mbrojtjes dhe me institucionet e tjera, duke u siguruar që Forcat tona të armatosura të zhvillojnë kapacitete profesionale për ruajtjen dhe garantimin e paqes gjithandej ku mund t’i kërkohet”, tha Osmani.

Fjalimi i saj i plotë:

I nderuar kryeministër i Republikës, z. Kurti!

I nderuar ambasador i SHBA-ve, z. Kosnet!

I nderuar ministër i Mbrojtjes, z. Mehaj!

Të nderuar ushtarë, nënoficerë dhe oficerë të Forcave të Armatosura të Republikës së Kosovës!

Sot është ditë e veçantë për popullin e Kosovës, ngase partneri ynë strategjik, SHBA-të po ua dhurojnë forcave tona të armatosura 55 automjete ushtarake, në vlerë mbi 44 milionë euro, të cilat do t’i ndihmojnë Forcat tona të Armatosura që të përforcojë më tej kapacitetet e veta dhe do ta thellojë ndërveprimin e ushtrisë sonë me ushtritë aleate.

Si komandante supreme të Forcave të Armatosura të Republikës së Kosovës (FARK), jam tepër e lumtur që, së bashku me ju dhe me qytetarët e republikës po e shohim të jetësohet ëndrra jonë e përbashkët, që ushtria e vendit tonë të krijojë kapacitete operacionale të përafërta me aleatët tanë dhe të rreshtohet përkrah tyre në sigurimin e paqes, duke e marrë edhe vlerësimin e vazhdueshëm të tyre.

Me këtë rast, dua që t’ia shpreh mirënjohjen e qytetarëve të Republikës së Kosovës presidentit të SHBA-ve, z, Biden, ambasadorit Kosnet, qeverisë amerikane dhe mbarë popullit mik amerikan, i cili po kujdeset që Kosova të zhvillojë kapacitetet e saj ndërvepruese ushtarake, krahas zhvillimit të jetës demokratike dhe funksionimit të mirëfilltë të institucioneve të vendit. Ne u jemi përjetësisht mirënjohës dhe nuk do të reshtim kurrë së falënderuara dhe së ofruari dorën tonë të ndihmës kur ajo na kërkohet, sikur po bëjmë këto ditë me krizën afgane.

Të dashur ushtarë, nënoficerë e oficerë të FSK-së!

Pajisjet ushtarake të cilat po i pranoni sot janë dëshmi se FSK-ja po zhvillohet dita-ditës në ushtri bashkëkohore, e aftë që t’i shërbejë vendit dhe të sigurojë paqen e qëndrueshme në rajon, por edhe në partner të besueshëm të aleatëve tanë, synimet e të cilëve përkojnë me qëllimet tona strategjike.

Këto pajisje do t’ju ndihmojnë juve që t’i zgjeroni edhe më tej kapacitetet tuaja të plota operacionale, të parapara në Planin Gjithëpërfshirës të Tranzicionit, mbështetur në misionin dhe mandatin e ri tuajin. Ato do të ndikojnë që aftësitë operacionale të FSK-së të rriten dukshëm, si dhe që ushtria jonë të jetë plotësisht ndërveprues me partnerët tanë (sidomos me SHBA), duke ndikuar që së bashku me ta të jetë garantuese e paqes dhe e stabilitetit në rajon, pore dhe në gjithë botën, duke qenë se ju do të jeni plotësisht të gatshëm të merrni pjesë edhe në misione paqeruajtëse në të ardhmen. Këto pajisje, të cilat janë karakteristike për terrene të vështira dhe kanë rezistencë efikase ndaj goditjes së predhave do t’ju mundësojnë juve që veprimet tuaja në ruajtjen e paqes t’i zgjeroni e t’i shtrini gjithandej ku do t’ju kërkohet. Shpresoj që faza e ardhshme e ngritjes së kapaciteteve të përfshijë edhe helikopterë, të cilët, përtej ofrimit të kapaciteteve mbrojtëse, do të shërbejnë edhe për të shpëtuar jetë njerëzish në rast të emergjencave ose katastrofave humanitare, sikur janë ato që pasojnë ndryshimet klimatike. Prandaj, unë kërkoj ndihmën e aleatëve tanë edhe në pajisjen e forcës sonë të armatosur me helikopterë.

Të dashur ushtarakë!

Ne shpresojmë se do ta përmbyllim periudhën tranzicionit sa më shpejt që të jetë e mundur. Këtë garanci po na i japin partnerët tanë strategjik, SHBA-të para së gjithash, të cilat po punojnë ngushtë me strukturat udhëheqëse të Forcave tona të Armatosura, me Ministrinë e Mbrojtjes dhe me institucionet e tjera, duke u siguruar që Forcat tona të armatosura të zhvillojnë kapacitete profesionale për ruajtjen dhe garantimin e paqes gjithandej ku mund t’i kërkohet.

Prandaj, në këtë ditë të veçantë, dua t’ua shpreh falënderimin tonë të gjitha ushtrive të vendeve mike, mbi të gjitha ushtrisë amerikane, e cila po kujdeset çdo ditë që forcat tona të armatosura të zhvillohen më tej profesionalisht dhe të transformohen në forcë ushtarake profesionale dhe ndërvepruese me forcat e NATO-s, për ta garantuar paqen e gjithëbotshme. Ne duam, prandaj, që ta themi kumbueshëm, sot sikur dje, se përtej lumturisë që na e sjell ardhja e këtyre pajisjeve kaq të dobishme për ushtrinë tonë, gatishmëria për ta thelluar partneritetin strategjik me aleatët tanë perëndimorë është e paluhatshme.

Të dashur të pjesëtarë të forcave tona të armatosura!

Forcat e Armatosura të Republikës së Kosovës janë mekanizëm shumë i rëndësishëm për jetësimin e shtetësisë, pore dhe për mbrojtjen e sovranitetit dhe të paprekshmërisë së territorit të Republikës sonë. Sot, kur bashkë me miqtë tanë po e demonstrojmë aleancën tonë në shërbim të paqes, ne po e forcojmë shpirtin tonë liridashës e të vendosur.

Zoti ju bekoftë!

Zoti i bekoftë forcat tona të armatosura!

Zoti e bekoftë miqësinë tonë me aleatët tanë!

Zoti e bekoftë Republikën tonë!

Nderime atdheut!/Gazeta Sinjali/