Senatori amerikan, Bob Menendez, i cili është edhe udhëheqës i Komisionit të Senatit për Marrëdhëniet me Jashtë, është deklaruar për pritjen që i ka bërë dje kryeministrit të Kosovës, Albin Kurti, në Kongres.
Përmes një postimi, Menendez ka dhënë zotime të forta për angazhimin e ShBA-së për sigurinë e Kosovës dhe rajonit.
“Kisha nderin të prisja kryeministrin e Kosovës, Albin Kurti. I shpreha zotimet e palëkundura për sigurinë e Kosovës dhe shqetësimet e lidhura me veprimet destabilizuese të Rusisë në Ballkanin Perëndimor. Angazhimi i SHBA-së ndaj Kosovës dhe rajonit është më krucial se kurrë”.
Ndërsa, Kurti pas takimit ka folur për temat kryesore që u folën gjatë këtij diskutimi.
“Përkushtimi afatgjatë për siguri dhe paqe i Republikës së Kosovës, si dhe rëndësia e anëtarësimit të Kosovës në NATO, ishin temat kryesore në takimin ndërmjet Kryeministrit të Republikës së Kosovës, Albin Kurti me senatorin amerikan, Bob Menendez, njëherit Kryetar i Komisionit të Senatit të Shteteve të Bashkuara për Marrëdhëniet me Jashtë”.
