Kancelari gjerman Olaf Scholz tha se është “e nevojshme” që presidenti rus Vladimir Putin të kuptojë se nuk do ta fitojë luftën në Ukrainë, në mënyrë që të mund të fillojnë negociatat për t’i dhënë fund konfliktit.
“Pikëpamja ime, është e nevojshme që Putini të kuptojë se ai nuk do të ketë sukses me këtë pushtim dhe agresionin e tij imperialist – se ai duhet të tërheqë trupat,” tha Scholz në një intervistë për CNN që u transmetua të dielën. “Kjo është baza për bisedime.”
“Nëse shikon propozimin e ukrainasve, është e lehtë të kuptosh se ata janë gati për paqe”, shtoi ai. “Duhet të bëhet diçka. Kjo duhet të bëhet nga Putini.”
Kur u pyet nëse mund të arrihet ndonjë marrëveshje për t’i dhënë fund luftës – duke përfshirë mundësinë që Ukraina të mos rimarrë Krimenë ose pjesë të rajonit të Donbasit – Scholz tha se asnjë vendim nuk do të merret pa kontributin e Kievit.
“Ne i thamë [Ukrainës] se mund të shkojnë për anëtarësim në Bashkimin Evropian,” tha ai. “Ata po punojnë për të bërë progres në të gjitha kriteret që janë të rëndësishme për këtë. Unë mendoj se ata e dinë që ne jemi gati të organizojmë një mënyrë të caktuar garancie sigurie për vendin, në kohë paqeje, që do të vijnë, por ne nuk jemi ende atje.”
Të premten, Scholz vizitoi Shtëpinë e Bardhë për t’u takuar me presidentin Joe Biden, i cili vlerësoi kancelarin për “mbështetjen kritike ushtarake” të Gjermanisë për Ukrainën.
