image Rrahu bashkëshorten dhe vajzën 1-vjeçare, prokuroria kërkon paraburgimin e tij - Sinjali

Rrahu bashkëshorten dhe vajzën 1-vjeçare, prokuroria kërkon paraburgimin e tij

news image

Prokuroria Themelore në Gjakovë, ka bërë kërkesë në Gjykatën kompetente në Gjakovë, dega Malishevë, për caktimin e masës së paraburgimit, ndaj të pandehurit F.H., me dyshimin e bazuar se i njëjti ka kryer veprën penale “Lëndim i lehtë trupor”, raporton Gazeta Sinjali.

Prokuroria njofton se rasti ka ndodhur më 29 qershor 2021, në fshatin Ngucat, Komuna e Malishevës, në shtëpinë e tyre të përbashkët, ku i pandehuri kthehet nga puna në gjendje të dehur me një bashkëfshatar dhe menjëherë fillon t’i bërtasë bashkëshortes, L.H., për shkak se nuk po e përshëndet atë.

I revoltuar, prokuroria bën të ditur se ai dyshohet se kishte filluar ta sulmojë të dëmtuarën duke e goditur me shuplaka e grushte në kokë, si dhe e nxjerrë jashtë shtëpisë atë së bashku me tre fëmijët, duke i shkaktuar kështu lëndime të lehta trupore.

Gjithashtu, në të njëjtën datë dhe vend, i njëjti pasi e godet bashkëshorten, i shkakton lëndime trupore edhe viktimës së ndjeshme, vajzës së tij një (1) vjeçare E.H., duke e goditur atë me shuplaka në fytyrë.

Prokurori i rastit ndaj të pandehurit F.H., ka bërë kërkesën për caktimin e paraburgimit në afat prej 30 ditësh dhe i njëjti me urdhër të prokurorit gjendet në ndalim nga data 29 qershor 2021./Gazeta Sinjali/


Shpërndaje artikullin

Etiketat kryesore: