Ronaldinho ka pohuar se Gabriel Jesus do të tregojë se është ndër lojtarët më të mirë në botë këtë sezon, sepse ai po ndjen “dashurinë” në Arsenal.
Ish-ylli i PSG-së, Barcelonës dhe Milanit e ka mbështetur shokun e tij brazilian për të udhëhequr ‘Gunners’ përsëri në Champions League – dhe madje të bëjë një sfidë ‘shokuese për titull’.
Ish-sulmuesi i Manchester City ka shijuar një fillim të shkëlqyer në aventurë e tij të re në Arsenal duke shënuar shtatë gola në parasezon dhe më pas duke shënuar dy herë kundër Leicester City.
Paraqitjet e Jesus e kanë ndihmuar Arsenalin të jetë në krye të tabelës pas vetëm dy ndeshjeve së bashku me ish-klubin e tij City. Dhe trajneri i tij i ri, Mikel Arteta, e ka lavdëruar dhe ai është bërë menjëherë i preferuari i tifozëve.
Dhe fituesi i Topit të Artë të vitit 2005, Ronaldinho, tani 42 vjeç, theksoi: “Kur Gabriel iu bashkua Manchester Cityt, thashë se do të vazhdonte të ishte një nga lojtarët më të mirë në botë. Kur iu dha një shans, ai tregoi atë që ishte i aftë – por në Manchester City nuk i tregoi kurrë dashurinë që meriton një lojtar i cilësisë së tij.
“Në Arsenal atij i është dhënë shansi të jetë pika qendrore, atij i është treguar dashuria nga trajneri dhe tifozët, dhe tashmë ai po e kthen atë. Këtë sezon pres gjëra të mëdha prej tij – ai do të shpërblejë dashurinë e treguar nga tifozët, duke treguar se ai nuk është vetëm një nga lojtarët më të mirë në Premier League, por edhe në Evropë”.
Arsenali zbriti në vendin e pestë vitin e kaluar – dhe lejoi Tottenham të kapte vendin e fundit në Ligën e Kampionëve – pasi humbi derbin e Londrës së Veriut dhe një ndeshje që duhet të fitonte në Newcastle sezonin e kaluar.
Por Arteta është mbështetur përsëri në tregun e transferimeve me Oleksandr Zinchenko (32 milion funte) dhe Fabio Vieira (34 milion funte) nga Porto që iu bashkuan Jesus, 25 vjeç, në një Arsenal të rinovuar.
Ronaldinho fitoi titullin në Brazil, Spanjë dhe Itali gjatë një karriere të shkëlqyer ku fitoi edhe Kupën e Botës 2002.
Dhe braziliani parashikoi: “Arsenali do të rikthehet në top katër këtë sezon me nënshkrimet që ka bërë – ndoshta ata mund të arrijnë më shumë dhe të sfidojnë për titullin. Manchester City duket shumë i fortë dhe do të jetë favorit – por në futboll gjithçka është e mundur“, deklaroi ikona braziliane.
