Qeveria e Kosovës e ka ndryshuar dhe plotësuar një vendim të sajin të marrur në kuadër masave preventive kundër përhapjes së koronavirusit.

Me vendimin e ri, qeveria ndryshon dhe plotëson pikën 5 të vendimit të datës 13 mars 2020.

Kështu, paragrafit “Përjashtim bëjnë linjat e udhëtimit në ardhje me ekuipazh por pa udhëtarë, që shërbejnë vetëm për largim të udhëtarëve nga Kosova”, i shtohen fjalët si në vijim: “Gjithashtu, përjashtim bëjnë linjat e udhëtimit në ardhje me udhëtarë, të cilët janë shtetas të Republikës së Kosovës të cilëve ju pamundësua kthimi për shkak të Vendimit të lartpërmendur të Qeverisë Nr. 01/09, apo staf diplomatik të akredituar në Republikën e Kosovës, të cilave linja ju mund t’ju lejohet ardhje me leje të veçantë të ministrit të Ministrisë së Infrastrukturës dhe Ambientit, pas konsultimit me ministrin e Ministrisë së Shëndetësisë dhe ministrin e Ministrisë së Punëve te Jashtme dhe Diasporës”.

“Me këtë rast, obligohet Ministria e Infrastrukturës dhe Ambientit, Ministria e Shëndetësisë, Ministria e Punëve të Jashtme dhe Diasporës, dhe institucionet tjera relevante të kryejnë të gjitha procedurat për zbatimin e këtij vendimi”, thuhet në vendimin e qeverisë, që mban datën 17 mars.

Ndryshe, deri në këto momente në Kosovë numri i të prekurve me koronavirus ka arritur në 19./Gazeta Sinjali/