image Qeveria e Kosovës merr vendim për strehimin e refugjatëve afganë - Sinjali

Qeveria e Kosovës merr vendim për strehimin e refugjatëve afganë

news image

Qeveria e Kosovës ka miratuar propozimin e ministrit të Punëve të Brendshme, Xhelal Sveçla, për strehimin e menjëhershëm të refugjatëve afganë në Kosovë, raporton Gazeta Sinjali.

Kështu ka bërë të ditur ministri Sveçla përmes një postimi në Facebook, duke thënë se ky vendim, duke nisur nga fryma e interesave të përbashkëta në kuadër të bashkëpunimit të Kosovës me Shtetet e Bashkuara të Amerikës, është njëherësh edhe përpjekje e Republikës së Kosovës për të ofruar ndihmën e saj, duke respektuar parimet e të drejtës ndërkombëtare “për ofrim të ndihmës kategorisë së personave të cilët gjenden apo mund të gjenden në rrezik, u janë shkelur të drejtat themelore për arsye të luftës dhe konfliktit në Afganistan”.

Sevçla tha se ky vendim u hap rrugë refugjatëve afganë për një vend të sigurt, ku do të qëndrojnë përkohësisht, duke gëzuar të gjitha të drejtat themelore, sipas legjislacionit në fuqi.

“Pamjet që po shohim sot, jo shumë kohë më parë ishin pamjet që i kemi jetuar vetë dhe mbrojtja që kemi propozuar të ofrojmë sot, është prezantuar dhe zbatuar si koncept pikërisht për ekzodin e refugjatëve kosovarë në vitet e 90’ për t’i dalë në ndihmë Kosovës, e cila sot ka vullnetin ta kthejë këtë të mirë.”

“Ky vendim, i hap rrugë kësaj kategorie për një vend ku do të qëndrojnë përkohësisht, të sigurt, të gëzojnë të gjitha të drejtat themelore sipas legjislacionit tonë si dhe përkrahjen institucionale deri në krijimin e një zgjidhjeje afatgjate në Shtetet e Bashkuara të Amerikës”, shkroi ai.

Numri një i Punëve të Brendshme të Kosovës tha se kjo përpjekje është për të shpëtuar jetë dhe është “detyrim moral i vendit tonë dhe parim njerëzor, të cilit po i jepet karakter institucional si dhe është bashkëpunim i pandërprerë me shtetin amerikan, si aleat në këtë proces dhe në të gjitha proceset e rëndësishme të zhvilluara në Kosovë”./Gazeta Sinjali/


Shpërndaje artikullin