Qytetarëve të Kosovës do t’u kufizohet lëvizja dy herë nga 90 minuta vetëm edhe sot dhe nesër, shkruan Gazeta Sinjali.

Nga e hëna, me fillimin e fazës së dytë të lehtësimit të masave, qarkullimi do të lejohet dy herë nga dy orë në ditë sipas numrit të parafundit të letërnjoftimit.

Këtë e ka bërë të ditur kryeministri në detyrë, Albin Kurti i cili tha se rreziku ende nuk ka kaluar, prandaj do të vazhdojë kufizimi i lëvizjes së qytetarëve me orar më të zgjatur.

Orari i ri i qarkullimit i cili do të zbatohet nga dita e hënë (18 maj) pritet të publikohet së shpejti nga Ministria e Shëndetësisë.

Sipas njoftimit të Ministrisë së Shëndetësisë dhe të kryeministrit Kurti gjatë kësaj faze do të lejohen këto veprimtari:

-Tregtia me pakicë

-Dentistët dhe fizioterapeutët

-Floktarët dhe sallonet e ondulimit

-Tregu i gjelbër

-Gastronomia (merr me vete)

-Transporti hekurudhor

-Transporti urban dhe ndërurban

-Qendrat e thirrjeve

-Hapja e Muzeve dhe Galerive

IKSHPK mbrëmë ka njoftuar për 10 raste të reja dhe 1 të shëruar nga koronavirusi në Kosovë. Aktualisht janë gjithsej 955 raste me 691 të shëruar dhe 29 të vdekur./Gazeta Sinjali/