Presidenti francez Emmanuel Macron i tha të premten presidentit rus Vladimir Putin se ishte shumë i shqetësuar për situatën në Mariupol , qytetin ukrainas që është goditur nga bombardimet e vazhdueshme gjatë ditëve të fundit, sipas Pallatit Elysée.
Sipas një deklarate nga Elysee, Macron “ndau shqetësimin e tij ekstrem me Presidentin Putin në lidhje me situatën në Mariupol dhe kërkoi edhe një herë një armëpushim të menjëhershëm“.
“Presidenti [Macron] i kërkoi atij masa konkrete dhe të verifikueshme për heqjen e rrethimit të Mariupolit, lejimin e aksesit humanitar dhe një armëpushim të menjëhershëm”, shtohet në deklaratë.
“Presidenti [francez] përmendi përsëri përkeqësimin e situatës në Ukrainë, sulmet e vazhdueshme që godasin civilët dhe dështimin për të respektuar ligjin humanitar, ndërkohë që negociatat midis delegacionit rus dhe ukrainas nuk kanë çuar për momentin në ndonjë përparim,” sipas zyrës së Macron.
Në përgjigje të pyetjes së një gazetari nëse Putin e kishte akuzuar Ukrainën për krime lufte në bisedën me Macron, Elysee tha: “Siç e ka bërë publikisht, Presidenti Putin përsëri vendosi përgjegjësinë për konfliktin mbi Ukrainën”.
Telefonata zgjati pak më shumë se një orë, sipas Elysee.
