Duket paradoksale, por vetëm njëri prej këshilltarëve të ministrit në largim të Drejtësisë, Abelard Tahirit, ka fituar më shumë nga mëditja sesa vetë ministri. Altin Ademi që mbanë postin e shefit të kabinetit dhe postin e këshilltarit politik është vetëm njëri prej tre këshilltarëve të kushtueshëm të Abelard Tahirit, raporton Gazeta Sinjali.

Altin Ademi, Faton Fetahu dhe Afrim Kasolli si këshilltarë të Abelard Tahirit në total duke përfshirë mëditje, udhëtime, reprezentacionin dhe shpenzimet telefonike ata i kushtuan buxhetit të shtetit afër 27 mijë euro. Këto shpenzime nuk përfshinë edhe pagat mujore të tyre.

Gazeta Sinjali ka kërkuar qasje në dokumentet zyrtare për shpenzimet e kabinetit të ministrit Tahiri.

Top listës si shpenzuesi më i madh i këshilltarëve të Tahirit, është Altin Ademi, që buxhetit të shtetit i kushtoi afër 13 mijë euro. Faton Fetahu, është këshilltari tjetër që kushtoi afër 7 mijë e 400 euro, ndërsa Afrim Kasolli kushtoi më pak se 6 mijë e 500 euro.

Shpenzimet e tre këshilltarëve për dreka darka e pije

Top listës së shpenzimeve për këtë kategori e reprezentacionit i prinë, Afrim Kasolli, Faton Fetahu dhe Altin Ademi.

Faton Fetahu, këshilltari i ministrit Tahiri i cili në Qeverinë e kaluar kishte këshilluar një ministër që po drejtonte një sektor krejt të ndryshëm prej atij që ka këshilluar në Qeverinë Haradinaj.

Faton Fetahu në të kaluarën kishte qenë këshilltar i ministrit të Arsimit Shkencës dhe Teknologjisë, Arsim Bajramit, por në Qeverinë Haradinaj këshilloi, ministrin e Drejtësisë, Abelard Tahirin.

Vetëm në kategorinë e reprezentacionit, Faton Fetahu ka shpenzuar afër 2 mijë euro, që nga shtatori i vitit 2017 deri në gushtin e këtij viti.

Faton Fetahu, duket se ka qenë mjaftë aktiv edhe me shpenzimet e udhëtimeve zyrtare. Ai ka shpenzuar më shumë se 2 mijë eurove vetëm për këtë kategori. Ndërsa, ish-këshilltari i Arsim Bajramit, nga mëditja ka përfituar më shumë se 1 mijë e 400 euro.

Në anën tjetër në vendin e tretë për nga shpenzimet më të mëdha për dreka, darka e pije, gjendet shefi i kabinetit dhe këshilltari politik, Altin Ademi. Ai për kategorinë e reprezentacionit, ka shpenzuar më shumë se 1 mijë e 800 euro, raporton Gazeta Sinjali.

Por Ademi ka qenë i pa konkurrencë në shpenzimet për udhëtime zyrtare duke shpenzuar afër katër mijë e 800 euro. Ndërsa nga mëditjet, Ademi  ka fituar 1700 euro, më shumë edhe se vet ministri Abelard Tahiri i cili  ka shpenzuar më pak se 1 mijë e 400 euro.

Afrim Kasolli është këshilltari që ka shpenzuar më së shumti për dreka, darka e pije. Ai vetëm për këtë kategori ka shpenzuar afër 2 mijë euro. Nga udhëtimet zyrtare ka shpenzuar afër 1 mijë e 800 euro, ndërsa nga mëditjet ka fituar afër 1 mijë e 300 euro.

Buxhetit të shtetit vetëm nga thirrjet telefonike të tre këshilltarëve i kanë kushtuar afër 4 mijë e 700 euro nga tre këshilltarët e Tahirit./Gazeta Sinjali/