Lionel Messi ka thyer heshtjen pas disfatës së Argjentinës në finalen e Kupës së Botës 2026 kundër Spanjës, duke ndarë me ndjekësit e tij një mesazh prekës përmes rrjeteve sociale.
Ylli argjentinas dhe kapiteni i kombëtares, për të cilin kjo mund të ketë qenë paraqitja e fundit në një Kampionat Botëror, falënderoi tifozët për përkrahjen e vazhdueshme dhe theksoi se ndihet krenar për gjithçka që skuadra arriti gjatë këtij edicioni, pavarësisht humbjes në finale.
“Dhimbja është e madhe dhe do të duhet kohë që kjo plagë të shërohet. Por dua të mbaj mend gjithçka të bukur që përjetuam. Ndeshjet që përmbysëm, përkushtimin maksimal të secilit dhe mbështetjen e një vendi të tërë, që së bashku me punën dhe sakrificën e këtij grupi na bëri edhe një herë ndër ekipet më të mira në botë”, shkroi fillimisht Messi.
Futbollisti 39-vjeçar pranoi se zhgënjimi pas humbjes është i madh, por nënvizoi se fakti që Argjentina arriti të luajë në dy finale radhazi të Kupës së Botës mbetet një arritje e jashtëzakonshme.
“Sot është e vështirë ta vlerësojmë plotësisht atë që kemi arritur, por ky grup arriti të luajë në dy finale radhazi të Kupës së Botës. Faleminderit nga zemra për çdo urim dhe çdo mesazh. Edhe një herë arritëm ta bashkojmë vendin tonë dhe të ndajmë krenarinë e madhe për të qenë argjentinas”, shtoi ai.
Në përmbyllje të reagimit të tij, Messi nuk harroi të urojë edhe Spanjën për suksesin historik.
“Dua gjithashtu ta përgëzoj Spanjën për fitimin e kampionatit,” përfundoi legjenda argjentinase.
Në finalen e luajtur në stadiumin MetLife, Argjentina u mposht me rezultat 1-0 nga Spanja, ndërsa goli që vendosi fituesin u realizua nga Ferran Torres në kohën shtesë. Messi e përfundoi Botërorin me tetë gola dhe katër asistime, ndërsa kjo ishte ndeshja e vetme e turneut ku ai nuk regjistroi as gol e as asistim.
Edhe pse janë shtuar zërat se kjo mund të ketë qenë ndeshja e tij e fundit në një Kupë Bote – veçanërisht pas mbishkrimit “El Último Tango” në këpucët e tij – veterani argjentinas vazhdon të jetë nën kontratë me Inter Miamin deri në fund të vitit 2028 dhe ende nuk ka konfirmuar nëse do të tërhiqet nga futbolli.
Sinjali – aty ku e vërteta flet para lajmit!
