Parlamenti Studentor i Universitetit “Hasan Prishtina” ka njoftuar se studentët e Fakultetit të Mjekësisë janë përfshirë në listën e përfituesve të bursave nga Ministria e Arsimit, shkruan Gazeta Sinjali.

Sipas njoftimit, në listën paraprake të përfituesve nga konkursi për bursa të MASHT-it, nuk ishin përfshirë më shumë 150 studentë nga Fakulteti i Mjekësisë. Bëhet e ditur se kjo gjë ka ndodhur si pasojë e keqinterpretimeve të kriterit të kredive për një vit akademik.

“Pas ankesave të shumta nga mjekët e ardhshëm të Republikës së Kosovës, Parlamenti Studentor në koordinim të afërt me studentët Senatorë dhe përfaqësuesit e studentëve të Fakultetit të Mjekësisë, arriti që pas takimeve me Ministrinë e Arsimit dhe Shkencës, të përfshijnë edhe studentët e Fakultetit të Mjekësisë në listën e bursave të MASH-it për vitin 2020/21. Mospërfshirja në listën e parë të MASH-it, kishte ardhur si pasojë e keqinterpretimeve të kriterit të kredive (ECTS), për një vit akademik”, thuhet në njoftimin e Parlamentit Studentor./Gazeta Sinjali/