Gazeta Sinjali raportoi ekskluzivisht sot për një bastisje të Policisë së Kosovës, gjatë së cilës një polic qëlloi të dyshuarin në vetëmbrojtje. Lidhur me këtë, edhe Policia e Kosovës ka dalë me një deklaratë zyrtare.
Siç bën të ditur Policia, pas informacioneve të mbledhura dhe hetimeve të kryera, bazuar në urdhrin e gjyqtarit të procedurës paraprake sot më datë 08.05.2022, në lokacionin e dyshuar është kryer një bastisje nga zyrtarët policorë.
Sipas Policisë, me të arritur në lokacion-shtëpinë e banimit të personit të dyshuar policia ka hasur në personin e dyshuar, i cili papritmas ka drejtuar armën në drejtim të zyrtarëve policorë duke ua rrezikuar jetën e tyre.
“Falë shkathtësive dhe veprimeve të shpejta të zyrtarit policor i njëjti në vetëmbrojtje ka përdorur armën ndaj personit të dyshuar me qellim të neutralizimit të rrezikut për jetën e tij dhe kolegeve të tjerë”, thuhet në njoftimin e Policisë.
Njësitet policore në vendin e ngjarjes kanë hasur një arsenal armësh që posedonte personi i dyshuar.
Personi i dyshuar është transferuar për trajtim mjekësor, përderisa rasti vazhdon të hetohet edhe më tutje nga autoritetet kompetente.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
