Kryetarja e Kuvendit të Kosovës, Vjosa Osmani, duke folur për diskutimet që janë bërë sot në mbledhjen e kryesisë, ajo ka thënë se është vendosur që kryeministri Avdullah Hoti të raportojë para Kuvendit para se të niset për Washington.

“Me vendim unanim të anëtarëve prezent të Kryesisë, unë do t’i drejtohem kryeministrit të vendit, Avdullah Hoti, në mënyrë që ai t’i raportojë Kuvendit para se të niset për Washington në takimin e datës 27 qershor, duke e pasë gjithnjë parasysh rëndësinë e çështjes së dialogut dhe rolin mbikëqyrës që duhet ta luajë Kuvendi dhe detyrimin që e ka Qeveria që t’i raportojë Kuvendit për çështje të politikës së jashtme”, ka thënë Osmani.

Osmani po ashtu ka thënë se Hoti do tsqarojë para Kuvendit edhe për qëndrimet që do t’i mbajë Kosova atje.

“Do ta ftojmë kryeministrin që të vijë në Kuvend që të debatojë dhe raportojë para deputetëve lidhur me qëndrimet që do t’i mbajë Kosova. Datën do ta caktojmë bashkarisht, por patjetër që duhet të ndodhë para udhëtimit në Washington”.

Në një konferencë për media, Osmani ka njoftuar se të martën do të mbahen dy seanca plenare.

“Kemi vendosur që të martën t’i mbajmë dy seanca plenare. Seanca e parë do të jetë vazhdimësi e seancës së mbetur në gjysmë javën që shkoi që ka të bëjë me ratifikim të marrëveshjeve ndërkombëtare. Seanca e dytë do të përfshijë disa pika të reja të rendit që kanë të bëjnë me krijimin e Komisioneve Ad-Hoc për përzgjedhjen e disa bordeve dhe komisioneve që presin të trajtohen në Kuvendin e Kosovës”, është shprehur Osmani.

Ajo gjithashtu ka deklaruar se në njërën nga seancat do të diskutohet edhe për reciprocitetin me Serbinë.

“Një çështje tjetër që mund të trajtohet në atë seancë  apo në ndonjë datë tjetër që e caktojmë   do të jetë edhe interpelanca – sepse, afati përfundon brenda pak ditësh – në raport me kryeministrin e vendit e kërkuar nga një grup deputetësh që ka të bëjë me heqjen e reciprocitetit në raport me Serbinë”, ka thënë ajo.

Kryeparlamentarja gjithashtu ka njoftuar se Kryesia e Kuvendit ka miratuar edhe propozimin e saj që ka të bëjë me lënien e një karrige të zbrazët në qendër të Kuvendit dedikuar fëmijëve të vrarë gjatë luftës./GazetaSinjali/