Organizata Botërore e Shëndetësisë tani po numëron më shumë se 550 raste të lisë së majmunëve në mbarë botën, tha të martën për CNN International drejtuesja teknike e grupit për linë e majmunëve, Rosamund Lewis, transmeton Gazeta Sinjali.
“Ne aktualisht kemi një numër prej mbi 550 rastesh të konfirmuara në 30 vende në katër nga gjashtë rajonet e OBSH-së. Ajo që ne po shohim tani është me të vërtetë krejt ndryshe,” tha ajo, duke pasur parasysh që shpërthimi po ndodh në shumë vende menjëherë.
“Ne po shohim që të gjitha rastet shfaqen në një periudhë relativisht të shkurtër kohore. Ne po shohim që në pak ditë, në disa javë, ne po shohim mbi 500 raste. Kjo është ndryshe. Kjo nuk është parë më parë”, shtoi Lewis.
Në një përditësim gjatë fundjavës, OBSH tha se që nga e enjtja, kishte marrë raporte për 257 raste të konfirmuara të lisë së majmunëve dhe rreth 120 raste të dyshuara në 23 vende ku virusi nuk është endemik. Lewis tha se OBSH nuk e di burimin e shpërthimit dhe u bëri thirrje vendeve të përfitojnë nga ‘dritarja e mundësive’ për të parandaluar që rastet të shpalosen në një shpërthim më të madh.
Grupi tha në konferencën e tij të fundjavës se niveli global i rrezikut për shëndetin publik është i moderuar, ‘duke marrë parasysh se kjo është hera e parë që rastet dhe grupet e lisë së majmunëve raportohen njëkohësisht në zona gjeografike gjerësisht të ndryshme të OBSH-së dhe pa lidhje të njohura epidemiologjike me vendet jo-endemike në Afrikën Perëndimore apo Qendrore’.
“Rreziku i shëndetit publik mund të bëhet i lartë nëse ky virus shfrytëzon mundësinë për t’u vendosur si patogjen njerëzor dhe përhapet në grupe me rrezik më të lartë të sëmundjeve të rënda si fëmijët e vegjël dhe personat e imunosupresionuar”.
OBSH po u kërkon ofruesve të kujdesit shëndetësor që të vëzhgojnë nga afër simptomat e mundshme të tilla si skuqje, ethe, ënjtje të nyjeve limfatike, dhimbje koke, dhimbje shpine, dhimbje muskujsh dhe lodhje, dhe të ofrojnë testime për këdo që ka këto simptoma.
Gjatë një konference për lajme të hënën, Lewis tha “ne nuk jemi të shqetësuar për një pandemi globale por nga lija e majmunëve për momentin”. Virusi nuk është i ri, vuri në dukje ajo në CNN.
Ndërkohë, OBSH do të takohet këtë javë për të krijuar një agjendë kërkimore për virusin.
“Ka qenë atje më parë dhe ne kemi një bazë njohurish mbi të cilën mund të ndërtojmë, por ka ende shumë pyetje”, tha Lewis.
