Dje rreth orës 13:00, policia serbe ka arrestuar dy shtetas të Kosovës, të cilët dyshohet se kanë kaluar gabimisht kufirin Kosovë – Serbi, shkruan Gazeta Sinjali.

Gazeta Sinjali pak më parë raportoi se të arrestuarit janë Blerim Maqestena, asmablist i pavarur në Komunën e Podujevës, si dhe Berat Mexhuani, po ashtu nga fshati Dumosh i Podujevës.

Fazli Maqastena, vëllau i Blerim Maqastenës tha se ata po mbahen në paraburgim.

“Vëllai im edhe një fqinji yni kanë dalë për të shëtitur në Mirovc edhe dyshohet se mund të kenë hyrë në territorin e Serbisë aksidentalisht. Sipas asaj çka kemi arritur të kuptojmë nga Policia e Kosovës, në atë pjesë ka pasur shumë mjegull dhe ata kanë mundur ta humbin edhe rrugën”, tha ai për KlanKosovën.

“Ne kemi kontaktu me çdo instancë që kemi pasur mundësi. Nga ajo çka kemi marrë vesh ata po mbahen në paraburgim ose në Burgun e Prokuples ose në Kurshumli”.

Maqastena tregon se ka kontaktuar me avokatin e të arrestuarve.

“Kam kontaktuar edhe me avokatin e tyre. Atë ia kanë caktuar pa i pyetur këta për shkak se këta nuk kanë pasur mundësi të sigurojnë avokat. Ai ka ardhur nga Beogradi dhe nuk i kanë lënë me i marrë pyetje ata pa avokat”.

Ai thekson se avokati i ka treguar atij se edhe vëllai por edhe fqinji i tij janë mirë.

“Avokati më ka thënë se ata janë mirë dhe po mbahen mirë. E pyeta a janë gjallë? – më tha: ‘po gjallë janë’”.

Por, vëllai i asamblistit të Komunës së Podujevës ka dyshime se dy kosovarët mund edhe të keqtrajtohen.

Madje Fazli Maqastena, ka frikë se atyre po u ndodh më e keqja.

“Avokati më tha mirë janë. Por, unë nuk kam më shumë informacione. Nuk kam arritur të kontaktoj me ata. Nuk e di, se në çfarë gjendje janë – A mos po i maltretojnë? Ose nuk kemi siguri se a janë së pari gjallë?”./Gazetës Sinjali/