Policia e Kosovës e ka arrestuar një person i cili dyshohet se ka bërë një lajmërim të rremë në polici dje rreth orës 14:55, shkruan Gazeta Sinjali.

Sipas zëdhënësit të policisë për rajonin e Gjilanit, Ismet Hashanit, tha për Gazetën Sinjali se i dyshuari ka raportuar rrejshëm në polici se dy persona të panjohur ia kanë vjedhur 32 mijë euro.

Hashani njoftoi se policia shpejt e ka kuptuar se ky ka qenë një lajmërim i rremë, pasi që i dyshuari 30 mijë euro ia ka dhënë një personi tjetër, të cilit besohet se ia kishte marrë borxh dy vjet më parë.

“Më 30 dhjetor 2020 rreth orës 14:55 përmes telefonit i dyshuari, banor i Komunës së Vitisë ka raportuar policinë se pasi ka dalë nga banka ku ka tërhequr para në vlerë prej tridhjetë e dy mijë (32 000) euro i janë afruar dy persona të panjohur dhe i kanë grabitur paratë dhe të njëjtit  sipas tij janë larguar në drejtim të fshatit Smirë me një veturë “mercedes ngjyre e zeze”. Policia e Kosovës, Njësia e Hetimeve nga stacioni policor i Vitisë pas një pune operative, mirë të organizuar, mbledhjes se fakteve dhe dëshmive në teren kanë arritur që shpejte të gjejë fakte të qëndrueshme se i dyshuari i lartcekur ka lajmëruar rrejshëm”, tha Hashani.

I dyshuari për këtë rast është intervistuar dhe rasti ka shkuar në procedurë të rregullt./Gazeta Sinjali/