Nga dita e hënë, sektorit të gastronomisë në Kosovë do t’i lejohet shfrytëzimi i hapësirave të brendshme, por me kusht që klientët të posedojnë dëshmi se janë të vaksinuar, test negativ PCR ose serologjik.
Ministria e Shëndetësisë ka bërë të ditur se verifikimi është i lejueshëm edhe përmes formës elektronike, përmes QR kodit, ndërsa Agjencia e Ushqimit dhe Veterinarisë ka paralajmëruar se nuk do të ketë tolerancë për bizneset që shkelin masat anti-COVID.
Gastronomia deri më sot është lejuar të punojnë vetëm në ambiente të hapura.
Sipas vendimit të fundit të Ministrisë së Shëndetësisë, institucionet shtetërore dhe institucionet private detyrohen të paraqesin certifikatën e vaksinimit para hyrjes ku operojnë, përfshirë qendrat tregtare, Call center, gastronomia në ambientet e brendshme dhe të gjithë punonjësit në institucionet publike dhe private që kanë punë me palë.
Shkollat dhe çerdhet do të hapen nga e hëna, aktivitetet sportive mund të kenë prani të shikuesve deri 10 për qind të kapaciteteve në ambientet e brendshme, duke pasur certifikatën e vaksinimit ose testin PCR, serologjik ose testin rapid antigjen.
Prej 13 marsit 2020, deri më 26 shtator 2021, Kosova ka regjistruar 159 mijë e 870 raste me COVID-19, prej tyre 152 mijë e 758 janë shëruar, 4 mijë e 176 raste janë aktive, ndërsa 2 mijë e 936 kanë vdekur. Deri më sot, me dy doza të vaksinës janë vaksinuar mbi 500 mijë qytetarë./Gazeta Sinjali/
