Pas vërshimeve në qytetin e New York, Shërbimi Kombëtar i Motit e ka lëshuar paralajmërimin e parë ndonjëherë pasi stuhia Ida solli reshje të dendura, të cilat i vërshuan stacionet hekurudhore dhe rrugët në Manhattan, Brooklyn dhe New Jersey.
Një person ka mbetur i vdekur në New Jersey raporoti, The Washington Post.
Pak pas mesnatës, Kryetari i New York, Bill de Blasio, e shpalli gjendjen emergjente, duke thënë se: “Jemi duke u përballur me një ngjarje historike të motit sonte me reshje rekorde në mbarë qytetin, vërshime të ashpra dhe kushte të rrezikshme në rrugët tona.”
Në videot e publikuara në rrjetet sociale shihen stacione hekurudhore nëntokësore të vërshuara nga uji. Vërshimet kanë prekur edhe disa rrugë dhe shtëpi, shkruan BBC, përcjell Gazeta Sinjali.
Shërbimi Kombëtar i Motit njoftoi se ka regjistruar 8 centimetra reshje për vetëm një orë në Parkun Qendror të Nju Jorkut.
Policia e qytetit u ka bërë thirrje banorëve që të mos dalin në rrugë, ndërsa departamenti i zjarrfikësve ka thënë se po u përgjigjet thirrjeve për ndihmë në pjesë të ndryshme të qytetit. /GazetaSinjali/
