Në Spitalin e Përgjithshëm të Pejës një grua shtatzënë e infektuar me COVID-19, ka sjellë në jetë foshnjën e cila ka rezultuar pozitiv me koronavirus, shkruan Gazeta Sinjali.

Kështu ka bërë të ditur infermierja kryesore në këtë spital, Hidajete Krasniqi në një prononcim për Radio Një.

“Ka pasur edhe një rast, kur një nënë shtatzënë, e infektuar me COVID-19, ka sjellë në jetë fëmijën, që ka rezultuar pozitiv me coronavirus. Por, se të dy si nëna, ashtu edhe fëmija janë në gjendje të mirë shëndetësore“, ka thënë ajo.

Sipas kryeinfermieres Krasniqi, ka shumë fëmijë të infektuar, por se janë duke e kaluar lehtë këtë infektim.

“Kemi pranuar një foshnje, që së bashku me nënën lehonë ishin të infektuar dhe pas kontrollit janë lëshuar në shtëpi, pasi kanë gjendje të lehtë”, ka thënë Krasniqi.

Bazuar në të dhënat e fundit, Krasniqi ka thënë se gjendja me COVID-19 është lehtësuar, ndërsa lajmi i mirë është se ka rënë numri i viktimave, pasi ishte vetëm një humbje jete si pasojë e pandemisë, derisa ditë më parë, ka pasur numër shqetësues të viktimave.

“Për momentin janë 212 pacientë që po trajtohen për coronavirus, prej tyre 188 janë me oksigjenoterapi. Janë edhe 169 raste pozitive, 12 rezultuan negativ, derisa edhe 29 pritet të testohen”, ka thënë Krasniqi.

Kohëve të fundit, është një rritje e ndjeshme e infektimit të fëmijëve me COVID-19, gjë që ka prekur edhe regjionin e Pejës. /GazetaSinjali/