Një mosmarrëveshje në komunikacion përfundoi me plagosjen e Bekim Gashit, më 10 janar në Prizren. I dyshuari për këtë “Tentim vrasje” është Lekë Veseli, i cili me vendim të gjykatës ndodhet në paraburgim, raporton Gazeta Sinjali.

Sipas gjykatës, deri te plagosja erdhi pasi që Bekimi i kishte rënë borisë disa herë për ta sinjalizuar të pandehurin që të lëvizë dhe ta lirojë rrugën.

Bekimi përmes një postimi të gjatë në profilin e tij në Facebook, ka treguar versionin e tij se si ka ndodhur rasti.

Sipas tij, i dyshuari për tentim vrasjen e tij e kishte bllokuar rrugën, “për të bërë muhabet” dhe ndonëse ky e kishte sinjalizuar disa herë që ta lironte rrugën, duke i rënë borisë, ai nuk e kishte bërë një gjë të tillë.

Herën e fundit, kur Bekimi i kishte rënë borisë, pretendon se Lekë Veseli ka dalë nga vetura dhe i ishte afruar te vetura duke i bërtitur, për t’u kthyer më pas në veturën e tij, ku e kishte marrë armën e zjarrit me të cilën dyshohet se e ka qëlluar Bekim Gashin.

Ai thotë se e ka lajmëruar Policinë dhe derisa ishte kthyer në anën e majtë, thotë se i dyshuari e ka goditur me tytën e armës dhe derisa Bekimi kishte tentuar që ta neturalizonte, Leka dyshohet se ka shtënë me armë zjarri, duke e goditur sipërfaqësisht në këmbën e majtë.

Në atë moment, i plagosuri thotë se ka arritur që ta neutralizojë dhe ta mbajë të bllokuar për 15 minuta, derisa ka ardhur Policia në vendin e ngjarjes.

E gjithë kjo ngjarje, sipas Bekimit, është zhvilluar në sytë e gruas dhe vajzës së tij 5-vjeçare, të cilat ndodheshin me të në veturë.

“Unë, Bekim Ukë Gashi, isha tuj shku me punë familjare, me shoqen dhe vajzën e vogël 5-vjeçare. N’mes të rrugës ky matrapazi e ka ndal kerrin edhe ja ka kris muhabetit me ni person tjetër, për pak kohe i rash borisë (sirenës), dhe e mbajke rrugën e bllokume. Mbas pak prapë i rash (sirenës) njëjtë vazhdojke muhabetin, mbas ni kohe prapë reagova me (sirenë) dhe ky matrapazi doli prej kerrit u afru te unë me fjalët ‘ça ki a s’pot pritet a’ un isha n’kerr dhe i thash, ‘skajoje kerrin edhe tanë ditën bon muhabet’, matrapazi ma ktheu ‘kush k… je ti’ dhe dola prej kerit, i thash, mos përdor fjalë të flliqta o IDIOT.”

“Në atë moment matrapazi u kthy te kerri vet e ka marrë ALLTINË edhe m’u afru me fjalët ‘shka po don tash’, unë ja ktheva, ‘trimat nuk nxjerin ALLTIA’, i ligi e nxjerrë prej tutës, tash ki punë me polici. E thirra 192-shin dhe u ktheva në pozitën e djathtë, në atë moment ky matrapaz tinzakërisht m’ka goditë me “qyk t’Alltisë” në pjesën e majtë të kokës. Në atë moment telefoni m’ka ra prej dorës dhe ju vërsula për t’ja bllokuar ALLTINË, kur ja kom ulë ALLTIN, matrapazi edhe ni plumb e ka shkrep ku plumbi ma ka kapur këmbën e majtë, dmth. plagë sipërfaqësore dhe mbas kësaj arrita që t’ja bllokoj ALLTINË dhe matrapazin totalisht, që mos t’mund t’lëvizte deri sa t’vijnë policia.15 minuta e kam mbajt këtë matrapaz t’bllokum që mas me mujt me përdor atë virane, se tucat ndryshe s’dijnë.”

“Në momentin që ka ardhë polici afër, e kam liruar ALLTINË, ku pjesën të ‘kondaki’ dhe këmbëza e gishtit, ka qenë në dorën e matrapazit, kurse pjesa e shulit dhe pjesa ku shkrepet gjilpëra ka qenë e bllokuar në duart mia, që të mos mund të shkrepte, që siç e ceka më lartë, kjo quhet ‘TENTIM VRASJE ME ARMË ZJARI’, asni presje se kom shtu, as se kom hek, përndryshe dëshmi janë kamerat e sigurisë”, shtoi ai.

Ai tha se kurrë në jetën e tij nuk e ka provokuar ose ngacmuar asnjë njeri dhe lutet që “qifti i këtij t’ligu” të mos ia “pret” rrugën askujt.

“Edhe në fund ta ceki ma të keqën që ky as gjak shqiptari s’ka, sepse në prezencë të gruas dhe vajzës 5-vjeçare e ka nxjerrë ALLTINË dhe ka gjuajt, që në traditën tonë shqiptare dhe me kanun, nuk ka bo vaki kjo punë”, përfundoi ai.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata./GazetaSinjali/