Administratori i NASA-s, Jared Isaacman, ka deklaruar se agjencia amerikane hapësinore disponon pamje të disa fenomeneve ajrore të paidentifikuara, të cilat aktualisht nuk mund të shpjegohen me të dhënat ekzistuese.
Në një intervistë, Isaacman ka thënë se NASA ka regjistruar imazhe të fenomeneve që, bazuar në informacionet e disponueshme deri më tani, mbeten të pashpjeguara.
“nuk e dimë se çfarë janë”, ka deklaruar Isaacman, duke theksuar megjithatë se këto të dhëna nuk përbëjnë prova për ekzistencën e jetës jashtëtokësore.
Deklarata e tij vjen në një kohë kur institucionet amerikane kanë rritur fokusin mbi fenomenet ajrore të paidentifikuara (UAP), termi modern për atë që më herët njihej gjerësisht si UFO.
NASA ka bërë të ditur se shumë raste vazhdojnë të mbeten të paidentifikuara për shkak të mungesës së të dhënave cilësore, por kjo nuk nënkupton automatikisht se këto fenomene kanë origjinë jashtëtokësore.
Sipas Isaacman, materialet e publikuara nga agjencia tregojnë fenomene reale të pashpjeguara, por deri tani nuk ka prova për ekzistencën e anijeve aliene apo trupave jashtëtokësorë.
NASA ka deklaruar më herët se kërkimi shkencor mbi UAP-të synon mbledhjen e të dhënave më të sakta dhe përdorimin e metodave shkencore për të kuptuar këto fenomene, pa nxjerrë përfundime të parakohshme.
Sinjali – aty ku e vërteta flet para lajmit!
