Ministri i Mbrojtjes në Serbi, Alekander Vulin, ka thënë se i dërguari i posaçëm i presidentit amerikan për bisedimet Kosovë-Serbi, Richard Grenell nuk mund ta zgjidhë çështjen e Kosovës, duke thënë se këtë mund ta bëjnë vetëm serbët dhe shqiptarët.

“Nuk mund ta zgjidh ai dhe askush tjetër. Çështja e Kosovës mund të zgjidhet nga populli serb dhe shqiptar. Vetëm popujt mund ta bëjnë këtë”, tha Vulin.

Ministri serb i Mbrojtjes, ka thënë se SHBA-të dëshirojnë të tregojnë se janë më të përgatitura se BE-ja dhe se mund të zgjidhin probleme të cilat BE-ja nuk mund t’i zgjidhë, për çka, siç thotë ai, fajtore kryesore është BE-ja, transmeton Gazeta Sinjali.

“Marrëveshja e Brukselit, e cila është nënshkruar me ndërmjetësimin e BE-së nuk është respektuar dhe askush nuk është fajtor dhe nuk është përgjegjës për këtë. Pas kësaj, është e vështirë të kesh besueshmërinë e një negociatori të suksesshëm”, thotë Vulin për mediat serbe.

Ai më tutje thotë se BE-ja e ka humbur autoritetin dhe ndikimin e saj dhe amerikanët tani po përdorin këtë hapësirë.

“Shqiptarët vlerësojnë vetëm fuqinë, kjo është arsyeja pse ata sillen me përbuzje dhe mospërfillje ndaj BE-së. Nuk i ndëshkuan ata dhe tani ata po e kthejnë atë”, tha ministri serb i Mbrojtjes, Aleksander Vulin./Gazeta Sinjali/