Ministri i Mbrojtjes në Republikën e Kosovës, Armend Mehaj, është deklaruar pasi ministri serb, Aleksandar Vulin, i shoqëruar me me të rinjtë e partisë së tij ka bërë homazhe për kriminelin e luftës, Sllobodan Millosheviq.
Përmes një postimi në faqen e tij zyrtare në rrjetin social Facebook, Mehaj ka thënë se ky veprim duhet të jetë alarm për Bashkimin Evropian dhe gjithë botën perëndimore demokratike, raporton Gazeta Sinjali.
“Kur një ministër i një qeverie të një shteti i cili aspiron në Bashkimin Evropian, nderon dhe glorifikon të bëmat e një krimineli, duhet të jetë alarm për qarqet politikëbërëse dhe vendimmarrëse të BE-së dhe gjithë botës perëndimore demokratike”, ka shkruar ai.
Sipas tij, ky është një provokim i orkestruar që nënkupton kërcënim ndaj Kosovës, Bosnje e Hercegovinës dhe Kroacisë.
“Ky është provokimi i tij i orkestruar i radhës, që nënkuptohet kërcënim ndaj Kosovës, Bosnes e Kroacisë dhe popujve të tyre viktima të krimit të Serbisë së Millosheviqit, i cili përveç nga Vulin është lavdëruar edhe nga presidenti aktual i Serbisë, Vuçiq”, thuhet tutje në postim.
Mehaj është shprehur se është momenti i fundit për rreshtimin në anën e duhur të historisë, kërkim-falje dhe dënimin e kriminelëve serb.
