M.B., 22 vjeçar, është ankuar në Inspektoratin Policor të Kosovës për dhunë fizike që pretendon se i është bërë nga dy zyrtarë policorë në dhjetor të vitit 2019. Ai thotë se është futur dhunshëm në veturë dhe nga goditjet ka pësuar lëndime në qafë.
Duke rrëfyer për Gazetën Sinjali, djali nga Gjakova tregon se rasti kishte ndodhur në rrugën ‘Skënderbeu’ në Gjakovë, gjatë kohës sa policia e kishte ndaluar veturën në të cilën ndodhej ai.
Pasi policia kishte kryer kontrollën rutinore, M.B., thotë se është goditur fizikisht në qafë me ç’rast i është dashur të marrë trajtim mjekësor në Spitalin ‘Isa Grezda’ në Gjakovë.
“Më datën 5 dhjetor 2019, në rrugën ‘Skenderbeu’ isha në një lokal me të afërmit, më pas hypëm në veturë për të shkuar në shtëpi. Policia e Gjakovës na ndalon dhe na kontrollon dokumentet, pasagjerët dhe veturën. Asnjë gjobë nuk na shqiptuan sepse ishte gjithçka në rregull…Pasi bënë kontrollën, duke hyrë në veturë, unë duke biseduar me njërin prej të afërmve te mi ata fillojn të sillen në menyrë jonjerzore kundër nesh. Ne pa kundërshtuar asgjë, në mënyë të dhunshme na detyruan të futem në veturë duke me goditur rendë pa asnjë arsye”, thotë M.B., për Gazetën Sinjali.
Pas kësaj ngjarje, 22-vjeçari kishte shkuar për ta denoncuar rastin në Stacionin Policor në Gjakovë.
“Aty kemi dhënë deklaratën dhe ua treguam emrat e policëve: G.K dhe B.Gj.,”.
Pas dhënies së deklaratës, M.B., ishte shkuar për trajtim mjekësor në Spitalin ‘Isa Grezda’ në Gjakovë.
Por sipas tij, ata hasën sërish në policët që 22-vjeçari pretendon se e sulmuan fizikisht.
“Gjatë kohës sa isha në spital, të afërmit e mi ishin duke më pritur në oborrin e Stacionit Policor. Pas disa minutave vjen patrrolla që na kishte ndalur dhe u drejtohet të afërmve të mi ‘a e keni bërë ankesën, a e bëtë?’ me ton të lartë të zërit”, thotë më tej 22-vjeçari.
Disa ditë më vonë, qytetari ka bërë ankesë edhe në Inspektoratin Policor të Kosovës, këta të fundit kanë konfirmuar për Gazetën Sinjali se kanë nisur hetimet ndaj policëve që dyshohet se janë përfshirë në rast.
“Ju konfirmojmë se Inspektorati Policor i Kosovës respektivisht Departamenti për menaxhimin e ankesave ka pranuar ankesën nga qytetari në fjalë më 12 dhjetor të 2019-ës. Ky rast është përcjellë në Departamentin e hetimeve në IPK dhe është në fazën e hetimit në konsultim me Prokurorinë Themelore të Gjakovës”, thuhet në përgjigjen e Inspektoratit Policor të Kosovës për Gazetën Sinjali.
Për këtë rast Gazeta Sinjali ka dërguar pyetje edhe në Policinë Rajonale të Gjakovës. Policia ka konfirmuar se kanë pranuar ankesën e qytetarit nën dyshimet se policët në fjalë kanë përdorur forcën e tepruar gjatë një intervenimi policor.
“Drejtoria Rajonale e Policisë në Gjakovë ka pranuar ankesën e qytetarit kundër dy zyrtarëve policor për shkak të dyshimit se të njëjtit kanë përdorur forcën e tepruar gjatë një intervenimi policor, ankesë kjo që sipas procedurave standarde të operimit dhe ligjit të IPK-së, i është dërguar Inspektoratit Policor të Kosovës në kompetencë hetimi dhe veprimeve tjera eventuale. Në të njëjtën kohë, raporti i plotë i incidentit i është dërguar edhe komisionit për shqyrtimin e përdorimit të forcës që vepron në kuadër të Drejtorisë së Përgjithshme të Policisë së Kosovës”, thuhet në përgjigjen e policies.
Raporti mjekësor i 22-vjeçarit:
Kujtojmë se nëntor të vitit 2019, Prokuroria Themelore në Gjilan, Departamenti për Krime të Rënda, ka ngritur aktakuzë kundër komandantit të Stacionit të Policisë në Gjakovë, Kristë Gjokaj dhe pesë vartësve të tij kapitenin Bekim Preqi, rreshterin Gëzim Biblekaj, Agron Idrizin, Milot Ukajn dhe Shaban Limanajn, nën dyshimin për kryerjen e veprës penale: ’Keqtrajtimi gjatë ushtrimit të detyrës zyrtare ose autorizimeve publike’.
Gazeta Sinjali kishte publikuar pamjet e këtij rasti.
