Kryeministri i Maqedonisë së Veriut, Zoran Zaev dhe ministri i Shëndetësisë, Venko Filipçe, kanë njoftuar sot vendimet e qeverisë për paketën e re të masave kufizuese, duke ndjekur rekomandimet e Komisionit për Sëmundje Ngjitëse, shkruan Gazeta Sinjali.
“Qeveria ka vendosur që objektet hotelierike të punojnë deri në orën 18:00 dhe jo deri në orën 21:00, siç ka qenë deri tani. Masa quhet “Festoni me përgjegjësi”, ndërsa qëllimi është mbrojtja nga COVID-19”, tha Zaev.
“Masat do të jenë të vlefshme nga 18 dhjetori deri më 20 janar në mesnatë”, shtoi ai.
Nga ana e tij, ministri i Shëndetësisë, Venko Filipçe theksoi se situata e COVID-19 në vend mbetet e qëndrueshme, por ka ende një numër të madh të të infektuarve dhe të pacientëve të shtruar në spital.
Duke iu referuar masave të reja kufizuese, ai bëri thirrje që të mos dilet nga shtëpitë pas orës 18:00 pa ndonjë arsye të veçantë.
