Zyrtari i lartë i Brukselit, Miroslav Lajçak ka folur përsëri për idenë e shkëmbimit të territoreve mes Kosovës dhe Serbisë. Sipas tij, kjo është një ide shumë e rrezikshme, shkruan Gazeta Sinjali.
Në pyetjen se çfarë e ndryshon ardhjen e Joe Biden për Ballkanin dhe çfarë mësimesh do të marrë nga ndërmjetësimi i dështuar amerikan në vitin 2020 midis Serbisë dhe Kosovës, Lajçak tha se treguesit e parë janë emrat e stafit të tij.
“Ne kemi punuar me ta në të kaluarën dhe i dimë mendimet e tyre”, tha ai.
“Gjëja më e rëndësishme për mua është edhe një herë konfirmimi se uniteti SHBA-BE është një faktor vendimtar për suksesin në Ballkan.
Ne jemi komplementarë. Gjatë vitit të kaluar, ka pasur konfuzion rreth procesit të nisur nga Washingtoni, nga Richard Grenell, i dërguari special i Donald Trump. Departamenti Amerikan i Shtetit e ka mbështetur gjithmonë rolin udhëheqës të BE-së”, shtoi ndër të tjera Lajçak.
Përkundër pandemisë së koronavirusit, masave shtrënguese dhe krizës ekonomike, Ballkani Perëndimor mbetet një çështje e rëndësishme për BE-në.
“Besueshmëria dhe siguria e tij janë në rrezik”.
Kështu shprehet i dërguari Special i BE për dialogun midis Serbisë dhe Kosovës, me synimin për normalizimin midis dy vendeve, Miroslav Lajçak, në një intervistë për francezen “Le Monde”.
Bashkimi Evropian e nisi një përpjekje të re në korrik të vitit të kaluar, por erdhën problemet ligjore të presidentit, Hashim Thaçi, i cili po akuzohet për krime lufte nga Gjykata Speciale në Hagë.
“Po, ne kemi rifilluar dialogun pas një pezullimi 20-mujor. Më shumë se kaq, ne kemi ripërcaktuar procesin. Ne ramë dakord me Prishtinën dhe Beogradin që nuk do të angazhoheshim në një seri negociatash teknike, por në favor të një marrëveshje gjithëpërfshirëse dhe detyruese. Asnjë çështje nuk duhet të lihet jashtë, siç janë lënë në të kaluarën. Siç janë pretendimet e ndërsjellta financiare ose mosmarrëveshjet pronësore”, tha ai.
“Temat e tjera janë diskutuar, por kurrë nuk përfunduan në zbatim. Pra, të dy palët e dinë saktësisht se çfarë po negociohet. Ne tashmë kemi përfunduar diskutimet për personat e zhdukur, personat e zhvendosur dhe bashkëpunimin ekonomik. Por asgjë nuk zgjidhet pa zgjidhje.”
“BE është shumë e qartë në premtimet e saj të integrimit, me kusht plotësimin e kritereve dhe kryerjen e reformave të nevojshme. Kosova dhe Serbia e dinë se normalizimi është një parakusht. BE është një entitet shumë i fortë. Ne jemi si një cisternë, që nuk kthehet lehtë. Zgjerimi është një politikë zyrtare e BE, në bazë të angazhimeve të samitit të Selanikut (në 2003)”, përfundoi Lajçak.
