I dërguari i posaçëm i BE-së për dialogun ndërmjet Beogradit dhe Prishtinës, Miroslav Lajçak, ka shprehur gatishmërinë e tij për arritjen e marrëveshjes për deeskalimin e situatës në veri të Kosovës me negociatorin e Kosovës Besnik Bislimi dhe tha se ai po punon për përgatitjen e takimit të radhës ndërmjet Kosovës dhe Serbisë.
“Nga Dubrovniku kam udhëtuar për në Bratislavë, ku kam zhvilluar bisedime të rëndësishme bilaterale me zëvendëskryeministrin e parë të Qeverisë së Kosovës dhe kryenegociatorin Besnik Bislimi. Biseda jonë ka qenë e fokusuar në deeskalimin e situatës në veri të Kosovës, në përputhje me deklaratën e 27 të BE-së të 3 qershorit dhe të punojmë për zbatimin e të gjitha marrëveshjeve nga dialogu. Më vjen mirë që ramë dakord për hapat e parë drejt këtij qëllimi”, tha Lajçak në Facebook.
Siç ka shtuar ai, pas kthimit në Bruksel, ndër të tjera, ka pritur për shkëmbim mendimesh edhe kryetarin e Partisë Demokratike të Kosovës, Memli Krasniqi. Lajçak tha se është duke punuar në përgatitjen e një takimi të ri në nivel teknik ndërmjet Beogradit dhe Prishtinës.
Ai ka theksuar se para takimit me Bislimin dhe Krasniqin, në Forumin e Dubrovnikut është takuar me kryeministrin kroat Andrej Plenkoviq dhe ministrin e jashtëm italian Antonio Tajani.
“Forumi në Dubrovnik ofroi një mundësi të shkëlqyer për t’u shoqëruar me aktorë kryesorë nga Ballkani Perëndimor dhe më gjerë, për t’u rilidhur me kolegët dhe miqtë me të cilët kisha folur dhe me hapat e nevojshëm për të de-përshkallëzuar situatën në veri të Kosovës. I njoftova ata të dy me situatën rajonale, hapat e nevojshëm për de-përshkallëzimin dhe kthimin në dialog nën kujdesin e BE-së. Të dy vendet janë partnerë të rëndësishëm në Ballkanin Perëndimor. Unë jam mirënjohës për mbështetjen e punës dhe shikimit tim përpara për bashkëpunim të vazhdueshëm”, tha Lajçak.
Ai iu referua edhe takimeve me kolegët e tij amerikanë dhe britanikë Gabriel Escobar dhe Stuart Pich gjatë forumit në Dubrovnik dhe falënderoi ministrin e Jashtëm kroat Gordan Grliq-Radman për ftesën dhe organizimin e manifestimit.
