image Ky është zyrtari policor që dyshohet se kanosi me armë zjarri sigurimin që nuk e lejoi të futet pa rezervim në një lokal në Prishtinë

Siguri

Ky është zyrtari policor që dyshohet se kanosi me armë zjarri sigurimin që nuk e lejoi të futet pa rezervim në një lokal në Prishtinë

news image

Gazeta Sinjali raportoi pak më parë se një zyrtar policor i veshur si civil dyshohet se kanosi me armë zjarri sigurimin e një lokali në rrugën “B”, në Prishtinë, pasi që nuk u lejua që të futej brenda pa rezervim.

Sinjali mëson se zyrtari policor në fjalë është Flamur Keka.

Inspektorati Policor i Kosovës ka rekomanduar suspendimin e tij të përkohshëm dhe ndaj tij ka hapur rastin “Kanosje”.

Si ndodhi rasti?

Flamur Keka, zyrtar policor, të mërkurën mbrëma shkoi si civil në një lokal në rrugën “B”, në Prishtinë, por sigurimi nuk e lejoi që të futej brenda pa rezervim paraprak.

Ky ndalim e kishte acaruar policin në fjalë i cili kishte tentuar të futej me forcë brenda lokalit dhe gjatë konfrontimit me sigurimin dyshohet se ka nxjerrë një armë zjarri me të cilën ka kërcënuar dy rojet dhe klientët e këtij lokali.

Zyrtari policor nuk ishte prezantuar si polic kur kishte dashur të futej në lokal, e as kur ishte shtrirë përtokë nga kolegët e tij.

Flamur Keka e ka fshehur faktin që është zyrtar policor edhe nga patrulla policore që kishte shkuar për ta arrestuar në vendin e ngjarjes.

“E kemi një kafe në rrugën ‘B’, punojmë  veç me rezervime, edhe u ardhë dje një polic, nuk u lajmëru si polic, veç u ardhë në derë, ‘po du me hy mrena’. Sigurimat e kanë pyet a ki rezervim, ka thanë jo, e kanë kthy. Ka nejtë ja 10 minuta para derës, mas 10 minutave ka hy dhe ia ka nisë me debatu me sigurima. Sigurimat e kanë largu prej dere dhe e kanë shty poshtë. Duke u shty me sigurima, ai e ka nxjerrë alltinë, i është drejtuar sigurimave, ka pasë konflikt fizik dhe në asnjë moment nuk ka tregu që është polic civil.”

“Kanë qëllu rastësisht dy policë civilë në rrugën B, e kanë arrestu, e kanë mbajë shtritë, derisa ka ardhë patrolla me e arrestu. As atyne nuk iu ka kallëzu që është polic civil. Janë ja tre policë dëshimtarë të kësaj që po e them unë”, tha pronari i lokalit për Sinjalin.  

Ndonëse zyrtari policor nuk ishte prezantuar si i tillë, dy rojet e lokalit u arrestuan nën dyshimin se kanë kryer veprën penale “Sulm ndaj personit zyrtar” dhe me vendim të prokurorit atyre iu caktua masa e ndalimit për 48 orë.  

“Tash, sigurimat janë në mbajtje, ky është i lirë si kurgjo, edhe vepra i është hapë sigurimave si ‘Sulm ndaj personi zyrar’. Në asnjë moment ai nuk ka thanë që është polic dhe në momentin që e ka nxjerrë armën sigurimat kanë mendu që është ndonjë djalë problem, që shpesh na ndodhë me pasë”, sqaroi pronari i lokalit.

Lidhur me këtë rast nga Inspektorati Policor i Kosovës i kanë thënë Sinjalit se kanë rekomanduar suspendimin e zyrtarit policor në fjalë dhe ndaj tij është hapur rasti “Kanosje”.

“Duke ju referuar kërkesës suaj, ju njoftojmë se Inspektorati Policor i Kosovës me 24.11.2021 rreth orës 20:00 është njoftuar nga Policia e Kosovës, lidhur me raportimin e një incidenti në rrugën ‘B’ Prishtinë, në të cilin incident dyshohet të ketë qenë i përfshirë edhe një zyrtar policor.”

Hetueset e IPK-së me të pranuar njoftimin kanë filluar të ndërmarrin veprime hetimore në koordinim me Prokurorin e Shtetit kujdestar, ku zyrtari policor është intervistuar me dyshimin se ka kryer e veprën penale ‘Kanosje’. Rasti aktualisht është duke u trajtuar në procedurë të rregullt kurse si pjesë e procedurës administrative hetimore ndaj të dyshuarit është rekomanduar suspendimi i përkohshëm”, thuhet në përgjigjen e IPK-së për Sinjalin.

Nga Drejtoria Rajonale e Policisë në Prishtinë nuk kanë kthyer përgjigje në pyetjet e Sinjalit për këtë rast, mirëpo në raportin 24-orësh shihet se rasti në fjalë tani është ricilësuar si “Lëndim i lehtë trupor”.

“LËNDIM I LEHTË TRUPOR · Rr. B, Prishtinë, 24.11.2021 – 19:25. Janë arrestuar dy të dyshuar meshkuj kosovarë pasi që të njëjtit pas një mosmarrëveshje kanë sulmuar fizikisht viktimën mashkull kosovar. Viktima ka pranuar trajtim mjekësor, ndërsa dy të dyshuarit pas intervistimit me vendim të prokurorit janë dërguar në mbajtje”, thuhet në raportin e PK-së.           

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata./GazetaSinjali/