Me 45 vota për, shqiptari Dritan Abazoviq sot është zgjedhur kryeministër i ri i Malit të Zi, shkruan Gazeta Sinjali.
Abazoviq, në pasditen e sotme u propozua për kryeministër nga presidenti i Malit të Zi, Milo Gjukanoviq.
Por kush është Dritan Abazoviq dhe si erdhi në krye të qeverisë malazeze?
Dritan Abazoviq u lind më 25 dhjetor të vitit 1985 në Ulqin, ku u rrit dhe e përfundoi shkollën fillore e gjimnazin.
Abazoviq u përfshi herët në jetën politike pasi mori pjesë në zgjedhjet e vitit 2012, ku fitoi shtatë mandate në Kuvendin e Malit të Zi dhe ai u bë njëri ndër deputetët më aktiv në Kuvend.
Në fillim të vitit 2015, Abazoviq themeloi URA-në, lëvizjen qytetare integraliste politike. Në zgjedhjet parlamentare që u mbajtën në vitin 2016, URA mori pjesë si pjesë e “Koalicionit të Madh – Çelësi” dhe Abazoviq u zgjodh përsëri deputet në Kuvendin e Malit të Zi.
Në mesin e korrikut të vitit 2020 URA i prezantoi opinionit platformën “E zeza në të bardhë” dhe me këtë program, Abazoviq garoi në zgjedhjet e 2020-s.
Ky koalicion arriti qëllimin e vet dhe u bë faktor kyç për pushtetin e ardhshëm. Pikërisht katër mandatet e tyre ishin vendimtare, sepse saktësisht aq janë nevojitur koalicioneve opozitare të formojnë shumicën në parlament dhe për herë të parë në historinë e Malit të Zi të ndryshojnë pushtetin në zgjedhje.
Parlamenti i Malit të Zi më 4 dhjetor të vitit 2020 e votoi Qeverinë e 42-të me radhë. Abazoviqit iu besua funksioni i nënkryetarit të Qeverisë që mbulon sektorin e sigurisë.
E sot, Abazoviq u mandatua nga presidenti malazez, Milo Gjukanoviq dhe me 45 vota për u zgjodh kryeministër i ri i Malit të Zi.
Kryeministri Abazoviq deri tani ka pranuar urime të shumta, duke përfshirë krerët e partive në Kosovë, kryeministri i Shqipërisë Edi Rama e të tjerë.
