Kryeministri i Kosovës, Albin Kurti, e ka dënuar sulmin e forcave ruse ndaj civilëve në një shkollë në rajonin e Luhansk të Ukrainës.
Me anë të një postimi në llogarinë e tij në Twitter, Kurti ka thënë se Kosova solidarizohet me popullin ukrainas.
“I indinjuar nga sulmi brutal i Rusisë ndaj civilëve të pafajshëm në një shkollë në fshatin Bilohorivka, në Luhansk. Duke i mbijetuar gjenocidit të fundit të shekullit të 20-të dhe menjëherë pas arritjes së çlirimit, populli i Kosovës qëndron në solidaritet me popullin e Ukrainës”, ka shkruar Kurti.
Guvernatori rajonal i Luhanskut, Serhiy Gaidai, ka deklaruar se Rusia ka hedhur bombë në një shkollë në fshatin Bilohorivka.
Ai është shprehur se streha e qytetit kundër bombave ishte shkatërruar më herët, duke e lënë bodrumin e shkollës si vendin e fundit ku njerëzit të strehoheshin nga sulmet ruse.
Rreth 90 persona ishin në bodrum kur u godit nga bomba dhe rreth 30 janë shpëtuar nga rrënojat.
Ministria ruse e mbrojtjes nuk iu përgjigj menjëherë një kërkese për koment në lidhje me bombardimin e supozuar, raportoi Reuters.
