Kryeministri i Kosovës, Albin Kurti ka shprehur ngushëllime për familjet e viktima pas sulmit të mbrëmshëm në Hamburg të Gjermanisë, ku la disa të vdekur.
Në një postim në Twitter, Kurti tha se ndihet i trishtuar për këtë lajm dhe se e dënon këtë akt të pakuptimtë dhune.
Postimi i plotë:
“I trishtuar thellësisht nga lajmi i të shtënave masive të djeshme në një sallë të Dëshmitarëve të Jehovait në #Hamburg që mori jetën e disa njerëzve. Ne e dënojmë këtë akt të pakuptimtë dhune dhe shprehim ngushëllimet tona për familjet dhe të dashurit e viktimave”, shkroi ai.
Shtatë persona, përfshirë një foshnjë të palindur, u vranë nga të shtënat në një sallë mbledhjesh të Dëshmitarëve të Jehovait në qytetin gjerman të Hamburgut, sipas policisë.
Ata thanë se personi i armatosur veproi i vetëm në sulmin e së enjtes dhe më vonë mori jetën e tij, teksa ende nuk dihen motivet e tij.
Ndërkohë tetë persona u plagosën, katër prej të cilëve në gjendje të rëndë. Një ugandas dhe një ukrainas ishin mes të plagosurve.
