Kryeministri i Republikës së Kosovës, Albin Kurti, përmes një video i është drejtuar qytetarëve të vendit lidhur me zhvillimet e fundit në katër komunat e banuara me shumicë serbe në veri të vendit, raporton Gazeta Sinjali.
Kurti tha se kryetarët e komunave në veri janë të vetmit që kanë çfarëdo legjitimiteti të jenë në ndërtesa të komunave, dhe në shërbim të qytetarëve.
Ndërsa, ndër tjera foli edhe për dhunën e protestuesve, që sipas tij vjen nga grupe të së djathtës ekstreme të cilët të maskuar vandalizojnë, sulmojnë dhe djegin çdo gjë që nuk e konsiderojnë serbe.
Ai po ashtu tha se këta protestues janë punëtorë të varfër të multi-milionerëve, pronarëve të mëdhenj të bizneseve dhe të kontrabandës, si Milan Radojçiq e Zvonko Veselinoviq që i marrin urdhrat nga Vuçiqi, Vulini e Daçiq.
“Ekstremistët dhe milicët kanë emra të veçantë. Ata nuk janë populli. Komuniteti serb duhet të çlirohet prej tyre. Ne i kemi identifikuar shumicën e tyre dje dhe sot. Nuk mund të ketë individë e as grupe mbi ligjin e më të fuqishëm se shteti. Të tillë janë kriminelët multi-milionerë si Milan Radojçiq e Zvonko Veselinoviq. Ata janë pronarë të mëdhenj të bizneseve e të kontrabandës, që i kushtëzojnë punëtorët e varfër të tyre, të dalin në protesta të dhunshme. Në fakt, kjo është mënyra e vetë shefave të tyre urdhërdhënës në Beograd ndaj administratës publike: mënyra e Aleksandar Vuçiq, Aleksandar Vulin dhe Ivica Daçiq”, tha Kurti.
