Kryeministri i Kosovës, Albin Kurti që vizitës në Pragë të Çekisë ku ka dorëzuar aplikimin e Republikës së Kosovës në Bashkimin Evropian, u prit sot në një takim bilateral nga ministri i Punëve të Jashtme të Çekisë, Jan Lipavský.
Kryeministria njofton se në takim u diskutua për marrëdhëniet dypalëshe dhe për bashkëpunimin e afërt ndërmjet dy vendeve, veçanërisht gjatë Presidencës çeke të Këshillit të Bashkimit Evropian.
Kurti e falënderoi Republikën e Çekisë dhe ministrin Lipavský për mbështetjen e vazhdueshme dhe të zëshme që i kanë dhënë Kosovës në synimet e saj për integrim evropian dhe evro-atlantik, thuhet në njoftimin e Qeverisë.
Kryeministri veçoi rolin e rëndësishëm dhe përkushtimin e Presidencës çeke të Këshillit të BE-së në trajtimin me prioritet të çështjes së liberalizimit të vizave. Dje, Këshilli i BE-së dhe Parlamenti Evropian u dakorduan për heqjen e regjimit të vizave për qytetarët e Republikës së Kosovës më së largu me 1 janar 2024.
“Në takim gjithashtu u fol edhe për bashkëpunimin rajonal, marrëveshjet që u nënshkruan në kuadër të Procesit të Berlinit dhe procesin e dialogut ndërmjet Kosovës dhe Serbisë”, thuhet në njftimin e Kryeministrisë së Kosovës.
